Qore Khadar M. Dhako
Laascaanood (Dawan) Maleeshiyaadka Huwanta ee dagaalka iyo qalalaasaha ka wada magaalada Laascaanood ee gobolka Sool ayaa shalay dagaal saddex geesood ah ku soo qaaday fadhiisimada Ciidamada qaranka Somaliland, iyada oo ciidamadu dhirbaaxo laxaad leh ku dhufteen maleeshiyaadkii soo duulay, isla markaana gaadhsiiyay khasaare baaxad leh.
Dagaalkan u dhaxeeyay Ciidamada qaranka Jamhuuriyadda Somaliland oo ka dhacay Jiida Xargaga iyo Galbeedka Laascaanood ayaa Ciidamada qaranku khasaare baaxadleh gaadhsiiyeen Maleeshiyaadka huwanta.
Ciidamada qaranka ayaa dagaalkan shangaadhi ka gubay Maleeshiyaadka huwanta, waxaana Saddex ka mida gaadiidka lagu gubay agagaarka xarunta agoomaha ee Galbeedka Magaalada Laascaanood halka labada kale lagu gubay deegaanka Oodo gooye ee Koonfurta bari ee Magaalada.
Sidoo kale waxa Ciidamada qaranka ku jabiyeen Maleeshiyaadka huwanta Xargaga, Xarunta agoomaha, Kaalinta ina Jabuutaawi, Oodogooye, Darimadoobe, Buurta Hodanka, Buurta Sayidka, Jabka qoriga, Maraaga Baligacalaacal iyo Masjidka Eerboodka Gambadha. waxaana jiidahaas ka soo gaadhay Maleeshiayadka huwanta khasaare aan la soo koobi karin.
