Safiirka Turkiga u fadhiya Soomaaliya Amb. Olgan Baker ayaa sheegay in la soo gaba gabeeyay dhismaha Saldhiga Milateri ee Turkiga ka waday magaalada Muqdisho.
Danjire Olgan Baker oo shalay wariyeyaasha kula hadlayay xarunta Safaaradda ee Muqdisho ayaa sheegay in bisha Agosto ee soo socoto ay Muqdisho imaan doonaan Saraakiisha Milateri ee saldhiggaas tababarka ku siin laheyd Ciidamada Soomaalida.
Waxaa uu sheegay in bisha September ee soo socota la furi doono Saldhigga, iyadoo lagu wado in kumanaan askar Soomaali ah tababar lagu siiyo bilaha soo socda.
Turkiga ayaa dhawaan balan qaaday inuu ka qeyb qaadanayo dhismaha ciidamada qalabka sida ee dalka Soomaaliya, iyadoo heshiisyo dhinaca milateriga ah ay hore labada dal u kala saxeexdaan.
Madaxweynaha Turkiga Recep Tayyib Erdogan ayaa sannadkii hore mar uu u tagay magaalada Muqdisho furitaanka safaaradooda ayaa sheegay inuu furi doono saldhig milateri oo ay ka dhisanayaan Muqdisho.
