Badhasaabka gobalka Awdal Md.Mustafe Shiine, ayaa sheegay in maalinta uu ka tago Xisbiga KULMIYE ee uu ka tiran yahay uu toos ula shaqeyn doono Xisbiga WADDANI isla mar ahaantaana aanu qarin doonin taageeraddiisa iyo la shaqeyntiisa Xisbigaasi.
Md.Mustafe Shiine oo inta badan lagu xanto in uu yahay siyaasi aan hal-adeyg lahayn, ayaa hadalkan ku sheegay waraysi dhinacyo badan taabanaya oo uu Hargeysa ku siiyey Talefeeshanka somalinews, waxaana uu hadalkiisu u dhignaa sidan.
“Haddii aan KULMIYE ka baxo, hoos u lama shaqeynaayo WADDANI ee toos baan u la shaqeynayaa.”.Ayuu ku yidhi Mustafe Shiine.
Hadalkan Mustafe Shiine, ayaa u muuqda mid muujinaaya in ay soo yaraanayso kalsooniddii badnayd ee uu ku qabay Xisbiga KULMIYE isla mar ahaantaana uu muddooyinkii dambe ka waayey tix-gelin iyo weji furnaan uu hore uga bartay Kaadiriyiinta Xisbiga KULMIYE, waxaana sababtan loo aanaynayaa ka dib markii horraantii sannadkan uu Mustafe Shiine magaalada Ceerigaabo ee Gobalka Sanaag uu gayn kari waayey guddoomiyaha Xisbigaasi Muuse Biixi Cabdi.
