Wasiirka Wasaaradda Hawlaha Guud,Guryaynta Iyo Gaadiidka Somaliland Cali Xasan Maxamed (Cali Mareexaan) ayaa ku haftay su’aal laga waydiiyay Dugsi wax lagu barto oo caan ah oo Hargeysa kuyaala oo qaybo ka mid ah la sheegay in ganacsato ay Xukuumaddu ka iibisay,waxa uu wasiirka Mareexaan tahli waayay inuu su’aal waafi ah ka bixiyo Dugsigaasi oo uu Buuq ka taagan tahay maalmihii u dambeeyay.
Wasiirka Cali Mareexaan oo uu wax ka waydiiyay Dugsigaasi Riis Wariye Maxamed Kuraase oo ka hawlgala Telefishanka Caalamiga ah ee Horn Cable Tv ayaa tahli waayay inuu wariyaha si fiican uga qanciyo waxa uu ka kala socdo Iibka Dugsigaasi oo la aaminsan yahay inaanay wasaarada Hawlaha guud ka faro badhnayn,islamarkaana uu isaga laftiisu isdiidsiinayo, waxaanu si kooban u yidhi sidan “Anagu wax la iibiyay ma ogin, iskuulkaasi waxaanu ka war helay Shalay illaa saaka,markaa taliyaha bilayska iyo Maayarkaba waanu wada hadalnay, Waxaanu markaas isla garanayay in la joojiyo”.ayuu yidhi Cali Mareexaan.
Maruu Wariye Kuraase Waydiiyay wasiirka xogo uu ka helay Dhacdadaasi oo ku saabsan in dad shacab ah oo ganacsato ah laga iibiyay dhulkaasi iyo sababta uu Wasiir Mareexaan u ogaan waayay maadaama oo uu yahay Masuulkii dawlada u qaabilsanaa dhulka danta guud,ayaa waxa uu wasiir Cali Mareexaan ugu jawaabayay wariyaha si cadho kujirto,waxaana uu yidhi sidan “Adigu ma baadhis ayaad samaysay,ma haayad amni ayaad tahay,anaga laftayadu waanu baadhaynaa”.
