Lionel Messi ayaa laga cafiyay ganaaxii afarta kulan ahaa ee kaga yimid FIFA kadib markii ay xiriirka kubadda cagta Argentina racfaan ka qaateen eedeyntii aheyd inuu aflagaado u geystay calanhaye kulan ka tirsan isreeb-reebka koobka Aduunka oo ay guul dirqi ah ka gaareen Chile
Weeraryahanka Barcelona ayaa laga mamnuucay inuu qarankiisa u ciyaaro wuxuuna ganaaxaas saameeyay kulankii ay qasaaro 2-0 ah kala kulmeen qarankiisa wadanka Bolivia.
Qof walba ayaa shaki galiyay rajada Argentina ee koobka aduunka kadib markii ganaax lagu soo rogay xidigooda ugu fiican, balse hadda qof walba ayaa rajeynaya in Argentina lagu arko koobka Aduunka.
“Guddiga racfaanka FIFA ayaa aqbalay racfaankii ka yimid xiriirka kubadda cagta Argentina oo ka wakiil ah ciyaariyahan Lionel Messi kana dhan ahaa go’aankii ay gudida ay ka qaateen anshaxa FIFA kuwaas oo cunaqabateyn kusoo rogay” ayaa lagu yiri bayaan kasoo baxay FIFA.
Si kastaba Lionel Messi ayaa u furan inuu kasoo muuqdo kulamada ka haray qarankiisa Argentina ee isreeb-reebka koobka Aduunka wadamada Koonfurta America.
