Madaxweynaha Jamhuuriyadda Somaliland Mudane Axmed Maxamed Siilaanyo ayaa kulan degdeg ah isugu yeedhay Shir Guddoonka Labada Golle Baarlamaan, Komishanka Doorashooyinka Qaranka iyo Saddexda Xisbi Qaran.
kulankaasi oo ujeedadiisu ahayd sidii loogu damqan lahaa shacbiga Somaliland ee ay soo foodsaartay Abaarta baahsan ee Dad iyo Duunyaba saamaysay, ayaa lagu gorfeeyey sidii dib loogu dhigi lahaa diwaangelinta codbixiyeyaasha maadaama oo xaaladu wakhtigan ku adag tahay shacbiga la rabo inay is diwaangeliyaan.
Waxa uu madaxweynuhu Shirguddoonka Labada Gole Baarlamaan, Komishanka Doorashooyinka Qaranka iyo Saddexda Xisbi Qaran, u akhriyey qodobadan hoos ku xusan oo u dhignaa sidan:-
- Shirkan waxaan idinku yeedhay in aynu ka wada tashanno sidii aan isu waafajin lahayn Diiwaangalinta Cod-bixiyayaasha laga qabanayo Gobollada hadhay iyo Gurmadka bini-aadannimo ee inagala gudboon xaaladda abaaraha ka sii daraysa.
- Waxaan ku hambalyeynaya Guddida Doorashooyinka iyo Axsaabta Qaranka sida ay isaga xil saareen taabba-galinta Diiwaangalinta Cod-bixiyayaasha, waxaana waajib ah in aynu dhammaystirno mashruucan sidii loogu talo galay innagoo midaysan.
- Waxaan idiin caddaynaya in ay Madaxweyne ahaan iga go’an tahay in aan dalkan ka suurtogaliyo doorasho xor iyo xallaal ah oo ku qabsoonta xilligii loogu talo galay. Waxaan ka soo horjeeda sabab kasta oo dib u dhig keeni karta.
- Sidaad la socotaan, xaaladda Abaaraha ee dalku way ka sii daraysa maalinba maalinta ka dambaysa. Sidaa darteed, waxa inaga saaraan masuuliyad Qaran iyo gurmad deg deg ah in aynu ka geysanno.
Haddaba, waxa isoo gaadhaya tallooyin badan oo farta ku fiiqaya in loo baahan-yahay in wakhti kooban la hakiyo diiwaangalinta si loogu gacan baxo gurmadka abaaraha. Arrintaa darteed, waxaan jecelahay innaga oo aan is tuhmin in aynu tallo wadaag ka yeelanno.
- Ugu dambayn, maadaama aynu ku jirno marxalad adag, waxaan idinkula dardaarmaya in aynu gees uga soo wada jeedsanno una midawno maslaxadda ummadda, danaha guud ee Qaranka iyo Gurmadka Abaaraha.
Ilaahay arrimahaa ha inoo sahlo, abaartana ha inaga jeediyo.. Aamiin..Aamiin
Intaasi ka dib markii shirku soo xidhmay, waxa saxaafada si wada jira ula hadlay Shir guddoonka labada gole Baarlamaan, Labada Xisbi Qaran oo madaxweynaha ku hambalyeeyey go’aanka geesinimada leh ee uu qaatay iyaguna ay ku raaceen kuna taageersan yihiin wixii shacbiga u dan ah, halka xisbiga Waddani ay u kala jabeen laba garab oo guddoomiye cirrona uu taageeray go’aankii Madaxweynaha sheegayna in wixii danta qaranku ku jiro wuu ku raacay madaxweynaha iyo Xubnihii isaga la xisbiga ahaa ee shirka ka soo qaybgalayna ay ku gacan saydheen guddoomiye cirro diideena in aanay la qabin go’aankiisa,
