Ingiriiska oo Caddeeyay Cadadka dhaqaalaha ay ku bixiyeen Diwaangelinta Cod-bixiyayaasha Doorashooyinka Somaliland
Xukuumadda Ingiriiska ayaa gaashaanka ku dhufatay eedo hore ula xidhiidhiyey inay qeyb ka ahayd inqilaab ka dhacay Somaliland, isla markaana faahfaahin ka bixisay dhaqaalaha ay ku bixiyeen diiwaangelinta codbixiyeyaasha Somaliland.
Xafiiska Wasiirka Afrika u qaabilsan Xukuumadda Ingiriiska oo jawaab ka bixiyey su’ aal weriye Maxamuud Cali Walaaleye oo Wargeyska Himilo ka tirsan ka weydiiyey eedo sirdoonka Maraykanka ee CIA-du kula xidhiidhiyeen inay qeyb ka ahaayeen iscasilaaddii Wasiirada sannadkii hore ayaa gebi ahaanba beeniyey, isla markaana sheegay inaanu dhab ahayn warkaasi.
Ms. Sheena lavery, afhayeenka xafiiska Afrika u qaabilsan Xukuumadda Ingiriiska oo ka jawaabaysay ayaa tidhi, “Warkaasi waa been, xaqiiqadiina wax jira maaha.”
Sidoo kale Ms. Lavery oo ka jawaabaysay su’aal wargeyska Himilo ka weydiiyey faahfaahinta dhaqaalaha Ingiriisku ku bixiyey diiwaangelinta codbixiyeyaasha iyo sababta laba nin oo u dhashay Soomaaliya ugu wakiisheen inay la shaqeeyaan guddi u kormeerta habsami u socodka diiwaangelinta ayaa ku jawaabtay, “Faahfaahinta dhaqaalaha Ingiriisku ku bixinayo diiwaangelinta codbixiyeyaasha waa sidan: DFID = £1.4m lagu taageeray hay’adda Interpeace oo gebi ahaanba loo isticmaali doono diiwaangelinta codbixiyeyaasha.
DFID = £200,000 lagu taageeray hay’adda Handicap International kaga qeybqaadanayso hawlaha diiwaangelinta codbixiyeyaasha.
CSSF* = £500,000 loo isticmaalayo hawlaha sharci ee la xidhiidha diiwaangelinta codbixiyeyaasha iyo guud ahaan hawlaha doorashada.
CSSF = £80,000 loo isticmaalao kormeerida. Waa sidaa qaabka loo qorsheeyey, laakiin weli lama wada isticmaalin.
Ms. Lavery ayaa raacisay, su’aaha la xidhiidhay sababta ajaanib loogu xilsaaray kormeerida, iyadoo la helayo dad u dhashay Somaliland, ayaa ku jawaabtey, “Waa si loo xaqiijiyo madaxbanaanida iyo dhexdhexaadnimada.”
