Madaxweynaha maamul goboleedka Puntland ee dalka Somalia, Cabdiwali Maxamed Cali Gaas ayaa mar kale u safraya dalka isu tagga Imaaraadka Carabta, si uu u dar dar geliyo dhameystirka heshiiska dhismaha iyo ballaarinta Dekeda Boosaaso qorshaha la doonayo in Dekeda loogu wareejiyo Shirkadda DP World.
Cabdiwali Gaas ayaa lagu wadaa in maanta oo salaasa ah u safro magaalada Abu Dhabi, halkaasoo ay ku sugan yihiin Guddoomiyaha Baarlamaanka maamulka Puntland, Wasiirka Maaliyadda iyo Wasiirka Dekedaha.
Wafdigan ayaa u joogay magaalada Abu Dhabi arrimaha heshiiskan iyo sidii la isugu afgaran lahaa, waxaana la sheegayaa in inta badan qodobada la isku afgartay.
Madaxweynaha Puntland C/wali Gaas ayaa lagu wadaa inuu goob joog ka noqdo saxiixa heshiiska Dekeda Boosaaso oo si rasmi ah qalinka ugu duugi doonaan isaga iyo Mas’uuliyiinta Shirkadda DP World.
Wararka qaar ayaa sheegaya in saxiixa heshiiskan uu dib u dhacay bishii la soo dhaafay sababo aan la shaacin awgeed, hase ahaatee Mas’uuliyiin ka tirsan Madaxtooyada Puntland ayaa laga soo xigtay in arrimo yar oo taagnaa oo aan la isku afgaran ay sababtay inuu dib u dhaxo saxiixaas.
Haddii heshiiskani hirgalo sherkadda DP Wolrd ayaa sannad wax ka yar dekeddii labaad ka kiraysanaysa dalalka geeska Africa, gaar ahaan Somaliland iyo Somalia.
