Warar xog ogaal ah oo uu helayo Shabakada Wargane ayaa waxay sheegayaan in madaxwaynaha Somaliland mudane Axmed Maxamed Maxamuud “Siilaanyo” iyo wafti uu hogaaminayo lagu wado inay socdaal ku tagaan magaalada Addis-ababa ee caasimada dalka Itoobiya maanta iyo Bari midkood.
Ujeedada sodaalkan madaxwaynaha iyo waftigan uu hogaaminayo ay ku tagayaan dalka Itoobiya ayaa lagu sheegay inay tahay martiqaad rasmi ah oo ay ka heleen xukuumadda Itoobiya.
Ilaha aanu xogahan kasoo xiganay waxay tilmaameen in waftiga madaxwaynaha raacaya ay kamid yihiin wasiirka madaxtooyada Somaliland Maxamuud Xaashi iyo xubno kale oo kamid ah golahiisa wasiirada,sidoo kalena wararka ayaa waxa ay iyaguna tibaaxayaan in maanta ay dalka Itoobiya kaga sii horeyn doonaan madaxwaynaha wasiirka madaxtooyada Somaliland iyo wafti uu hogaaminayo oo uu kamid yahay sida la sheegay gudoomiyaha xisbiga KULMIYE ahna murashaxa xisbigaasi Muuse Biixi Cabdi.
Xogahan uu Shabakada Wargane kasoo xigtay ilahaa kala duwan ka sokow ma jiraan warar madaxbanaan oo kala xaqiijinaya jiritaanka arrimahaas oo kasoo baxay dhinacyada ay khuseyso,sidoo kalena noomay suurto galin in aanu helno masuuliyiin xukuumadda ka tirsan oo aanu xaqiijinta arrimahaasi xidhiidh dhanka isgaadhsiinta ah aan kala samaynay.
Dhinaca kale ilo wareedyo xalay goor danbe soo gaadhay Shabakada Wargane ayaa tibaaxay in xildhibaano ka tirsan baarlamaanka Somaliland ay la kulmeen madaxwayne Siilaanyo isla markaana uu kala hadlay sida la sheegay sidii ay golayaasha dhexdooda ugaga ololayn lahaayeen meel marinta heshiiskaasi imaaraadku ku doonayo saldhigaasi Milateri ee Berera,kuwaas oo la sheegay in kulankoodan xalay uu kasoo shaqeeyey Xildhibaan Maxamed Cali Xirsi “Obama” oo kamid ah xildhibaanada xisbiga KULMIYE,waxaana xogahani ay tibaaxeen in xildhibaanadan xalay loo balan qaaday in lasiin doono lacag fara badan hadii ay ku guuleystaan meel marinta heshiiskaasi balse lama muujin xaddiga ay lacagtu leeg tahay.
