Wasaaradda dhallinyarada, ciyaaraha iyo dalxiiska Somaliland ayaa Maanta oo Khamiis ah si rasmiya ugu dhawaaqi doonta xilliga uu qabsoomi doono tartanka ciyaaraha gobollada Somaliland, kaas oo wajigii koowaad ee isreeb-reebka kubadda cagta la qabtay sannadkii hore.
Wajigii hore ee isreeb-reebka kubadda cagta oo sannadkii hore lagu qabtay magaalooyinka Borama iyo Burco ayaa waxaa u soo gudbay tartanka rasmiga kubadda cagta 8-gobol, kuwaas oo tartankan ku ciyaari doona Hargeisa Stadium.
Tartankan maanta lagu dhawaaqi doona oo ku kala baxaya ciyaaraha kubadda cagta, kubadda koleyga iyo ciyaaraha fudud (Orodka), ayaa ka xiiso badnaan doonaa tartamadii hore ee la qabtay, maadaama tartanka kubadda cagta lagu ciyaari doona garroonka Hargeisa Stadium oo Doogga Sanaaciga ah lagu goglay, halka sidoo kale garroonka Tima-cadde isna lagu sameeyay dayac-tir ballaadhan sidoo kalena Riimanka (Goolasha) qurraaradda ah ee caalamka lagu xidhi doono.
Isku soo wadda duubo, tartankan oo wasaaradda ciyaaraha lagu dhaliilayey qabsoomidiisa ayaa la filayaa sida aanu ku helay ilo xogogaal ah, in uu qabsoomo dhammaadka bisha soo socota ee October, laakiin waxa aynu ka war-sugi doonaa dhawaaqa berrito ee wasaaradda iyo waxyaabaha kale ee ay ku daraan qabsoomidda tartanka.
