Mucjisooyinka dunida aynu ku nool nahay ma aha kuwo la soo koobi karo waxaana ka mid ah arrimaha layaab leh xeebta ama gacan biyoodka loo yaqaano (Xeebtii Nabiyullaahi Ciise) oo ku taalla deegaan u dhaxeeya dalalka Turkiga iyo Giriigga oo ah biyo ay dadku sida dhulka u dul socon karaan oo aan ku liqayn si kasta oo aad u dul marto.
Xeebta loo yaqaano Jesus Beach (Xeebtii Nabi Ciise) waxay ku taalla gacanka Orhaniye Bay ee wadanka Turkiga, waxayna 36km koonfur bari ka xigtaa magaalada loo dalxiiska tago ee Marmaris.
Jesus Beach waa meel soo jiidasho leh oo ka mid ah meelaha ugu caansan, waxaana ku taala xeeb aad loo jecel yahay oo kumanaan dalxiisayaal ah ay booqdaan sanad walba.
Gacan biyoodkan loo yaqaano Jesus Beach oo ku xidhiidhsan badda Aegean sea ee u dhexeysa wadamada Turkiga iyo Giriiga ayaa waxaa uu leeyahay mucjiso u gooni ah oo uu kaga duwan meelaha la mid ah taasoo ah inaad gees ka gees ku dul socon karto adigoo biyaha ay ku joogaan jilbaha, kana baqeynin inaan quusto.
Taariikhyahanada ayaa sheegaya in Jesus Beach uu isagoo lugeynaya maray Nebi Ciise Caleyhi Salaam, ayna sababtay in halkaas loo bixiyo Jesus Beach oo la micno ah (Xeebtii Ciise).
Dad badan ayey la yaab ku noqotay markii ay arkeen dad iyagoo lugeynaya isaga socda gudaha xeebta Jesus oo ka mid ah meelaha ugu caansan dunida ee leh waxyaabo ay kaga gedisan tahay meelaha kale, waxaana dadka qaar ku adkaatay iney rumeystaan in gacan biyoodka intaas le’eg la isaga dul soconayo adigoo aan dareemin wax khatar ah.
