Waxa Uu Boggaadin U diray haweenayda loo magacaabay xilka Ra’iisul-wasaare ee Dalka Britain
Xukuumadda Somaliland ayaa boggaadisay ra’isel-wasaaraha cusub ee loo doortay dalka Ingiriiska, Theresa May oo maalintii shalay si rasmiya ula wareegtay xilka ra’isel-wasaarenimo ee dalkaasi. Sida lagu sheegay warsaxaafadeed kasoo baxay aqalka madaxtooyadda oo uu ku saxeexan yahay afhayeenka madaxtooyadda Cabdiraxmaan Sh. Cilmi Faahiye (Shamax), isla markaasina nuqul ka mid ah soo gaadhay Hubaal. waxaana uu u dhignaa sidan:
“Madaxwaynaha Jamhuuriyadda Somaliland, Mudane. Axmed Maxamed Silaanyo, isagoo ku hadlaya magaciisa, ka dawladda iyo ka shacbiga Jamhuuriyadda Somaliland, wuxu dhambaal hambalyo iyo boogaadin ah u dirayaa Ra’iisal-wasaaraha Cusub ee Britain Theresa May oo maantoo Arbaco ah 13.07.2016 la wareegtay xilka hogaamiye-nimo ee dalkaas.
Madaxweynuhu waxa uu dhambaalkiisa ku yidhi”Anigoo ku hadlaya Magacayga ka dawladayda, iyo kan shacbiga Somaliland gudo iyo dibedba, waxan kuu soo gudbinayaa hambalyo iyo bogaadin ku aaddan xilka cusub ee ra’iisal wasaaranimo ee laguugu doortay dalkaaga inaad hoggaamiso ”.
Waxan si muqleh kugu rajaynayaa inuu kuu fududaado xilkaa culusi, oo aad uga jibbo keento si buuxda. Somaliland iyo Boqortooyada Ingiriiska waxa ka dhexeeya xidhiidh qoto dheer oo soo jireena, soona taxnaa qarniyo, kaasoo ku dhisan is-aaminaad, istixgelin, wax wada qabsi iyo iskaashi dhinacyo badan leh, waxana xidhiidhkaasi kor u sii qaaday oo xoogeeyey ra’iisal wasaarihii kaa horeeyey Mr David Cameron, oo April 18/ 2013, nagu qaabiley Xarunta looga arrimiyo dalkiinna ee 10 Downing Street, anigoo ku rajo weyn inaad adiguna halkaa ka sii ambaqaadi doonto xidhiidhka labada dal, kaasoo wax badan ku soo kordhindoona, wada shaqaynteenna, gaar ahaan, dhinacyada siyaasadda, dhaqaalaha, horumarka iyo arrimaha nabadgelyadaba.
Waxaan mar kale kugu bogaadinayaa caleemo saarka xilka ra’iisal wasaarenimo iyo masuuliyada laguu cugtay, anigoo ku han-weyn, kuna kalsoon inaad dalkaaga u horseedi doonto horumar iyo barwaaqo.
ALLAA MAHAD LEH
Cabdiraxman Sh. Cilmi Fahiye (Shamax)
Af-hayeenka Madaxtooyada JSL.
