Mujaahid Cali Maxamed Yuusuf (Cali-gurey), ayaa isbarbar-dhigay Xaaladda ay ku nool yihiin Mujaahidiintii ka midka ahaa Ururkii SNM ee Xoreeyay Dalka iyo Nolosha Guddoomiyaha Xisbiga KULMIYE Muuse Biixi Cabdi oo uu sheegay inuu Qasriyo dhistay isla-markaana ku nool yahay Nolol aad uga duwan ta Mujaahidiinta kale
Cali-Gurey oo Shalay Saxaafadda kula hadlayey Magaalada Hargeysa, ayaa sheegay in inta badan Mujaahidiintii SNM Gidaarrada fadhiyaan iyaga oo baahan isla-markaana la yaabban sida ay wax uga socdaan Dalku, sidaa daraadeed aanu jeclayn in isaga loogu yeedho Mujaahid, “Muuse waa Mujaahid oo waa Run, laakiin aaway Raggii kale ee Mujaahidiinta ahaa, sow kuwan Gidaarrada wada fadhiya ee wada Cawlan ee mid walba keligii Gidaarka fadhiyo ee uu yaabban yahay, intuu isagu Qasriyo dhistay, ee uu kala ballaadhay ee uu Adduunyo kala wareejistay.” Ayuu yidhi, waxaanu intaa ku daray, “Daahir Rayaale oo ahaa Nabad-sugiddii Siyaad Barer ayaa Madaxweyne ka noqday (Somaliland) markaa waa maxay Mujaahidka la sheegayaa, Anigu Mujaahid ma ihi ee idinka ayuun baa iila baxay Mujaahid. Weliba waxaan leeyahay waar Erayga Mujaahid Dad badan baa Cuqdad ka qaba ee Aniga Mujaahid Cali-Guray ha I odhanina.”
