Wararka wargeyska Yool ka helaayo Magaaladda Berbera ee Xarunta gobolka Saaxil, ayaa tibaaxaya inuu nawaaxiga Haabadda Marsada Dekedda Berbera uu ku laalayo mid kamid ah Maraakiibta jiidda Xadhka Internet-ka Baddaha hoostooda mara, kaasoo sida wararka qaar lagu sheegay u socday inuu dhigo mid kamid ah caraabadda Xadhkaha Internet-ka xambaara, ee afka qalaad loo yaqaano Fiber Optics-ka khooriga gacanka ku meersan Haabadda Dekedda Berbera ama nawaaxigeedda, waxana Wararku intaa ku dareen, in carabka Xadhiga Internet-ka ee Markabkani sido ay leeyihiin Laba Shirkadood oo ah kuwa Isgaadhsiinta, oo iyagu iska kaashadday Dhaqaalaha ku baxaaya Xadhigan, wallow iluhu ay ka qaabsadeen inay xuseen Magacyadda Shirkaddaha.
Hase-yeeshee, docda kale, waxa xoggaha qaar lagu sheegay in Carabka Xadhiga Internet-ka ee Markabkani jiidayo uu kasoo xambaaray Xeebaha Dalka Cumaan, halkaasoo sida xoguhu xuseen uu ka dhacay heshiiska Somaliland lagu keenay xadhigan.
Xadhiga Fiber Optics-ka ama Intarnet-ka xambaara ee hadda la sheegay inuu soo gaadhay Markabkii siday nawaaxiga Dekedda Magaalada Berbera, ayaa haddii uu dhab noqdo, waxa uu noqonayaa xadhigii ama Fiber Optics-gii u horreyey ee Somaliland kasoo gala dhinaca badda, maadaama ay Somaliland kamid tahay dalalka Baddaha leh, oo iyagu aan u baahnayn in xadhig kan lamid ah looga soo talaalo Wadan kale. Sidoo kale, waxa hore u jiray xadhig xambaarsan magaca xadhka han Internet-ka ee baddaha hoostooda mara, oo laga soo qaaday dalka aynu dariska dhow nahay ee Jamhuuriyadda Jabuuti, isla markaana lasoo mariyey dhinaca dhulka ee xududa u dhaxaysaa labada dalka, kaasoo aakhirkii soo gaadhay magaaladda Hargeysa oo ah Caasimadda Somaliland.
Geesta kale, labada aqal ee Baarlamaanka Somaliland ayaa hore u ansixiyey Xeer muran badan dhaliyey, oo ku saabsan nidaamka Isgaadhsiineed ee uu dalkani yeelanayo, Xeerkaas oo Madaxweynuhuna dhaqan-gelintiisa saxeexay.
Yool
