Masuuliyiinta xisbiga WADANI ayaa warsaxaafadeed ay soo saareen waxay kusoo bandhigeen mawqifka ay ka taagan yihiin in dib loo dhigo diiwaangalinta codbixiyayaasha ee kazoo qabsontay gobolo badan isla markana dhawaan la filayo inay ka bilaabmato magaalada hargeysa.
Waxaana warsaxaafadeedka oo uu ku saxeexnaa gudoomiyaha golaha wakiilada Somaliland ahna gudoomiyaha xisbiga mucaaradka ah ee WADANI uu u dhignaa sida tan.
REF/XIS/WAD/XDH/2306/2016 Taariikh: 28th March, 2016
Ku: Madaxweynaha Jamhuuriyadda Somaliland =Hargeysa=
OG: Komishanka Doorashooyinka =Hargeysa
Ujeeddo: Mawqifka Xisbiga WADDANI ee ku Wajahan Hakinta Diiwaangelinta Cod-bixiyeyaasha
Mudane Madaxweyne naga guddoon salaan xushmad iyo qadarin mudan.
Diiwaangelinta codbixiyeyaasha waxay dalka ka bilaabantay 16/1/2016. Bilawgii diiwangelintana xaaladda abaartu way ka jirtey gobollada dalka oo dhan. Bulshada Gobolka Togdheer waxay soo jeediyeen baaqyo kala duwan oo ay ku codsadeen in dib loo dhigo bilawga diiwangelinta, hase yeeshee waxa la go’aamiyey in la bilaabo diiwaagelinta iyada oo la tix-geliyey qorshe-hawleedkii qaranku isku raacay ee diiwangelinta cod-bixiyeyaasha loo dejiyey.
Sidoo kalena abaar adag ayaa ka jirtey Gobolka Awdal waxayna codsadeen in diiwaangelinta dib loogu dhigo, lagamana yeelin. Sidoo kale, Gobollada Saaxil, Hawd iyo Gebiley oo duruufo adag oo abaaro ahi ka jireen waa laga diidey in diiwaanglinta dib loo dhigo.
Todobaadka soo socda oo ay diiwaangelintu ka bilaabmayso Gobolka Maroodijeex isla markaana aanay jirin duruuf ka duwan tii ka jirtey Gobolladii hore ee diiwaangelintu ka dhammaatey ama ay ka socoto komishankuna diyaariyey dhammaan wixii hawl ahaa ee looga baahnaa bilawga diiwaangelinta iyo iyada oo aanay jirin wax cabasho ah oo ka yimid shacbiga gobolka Maroodijeex lana xidhiidha dib-u-dhigisa diiwaangelinta cod-bixiyeyaasha ma muuqato mana jirto sabab loo hakiyo ama loo joojiyo.
Mudane madaxweyne joojinta ama hakinta diiwaangelinta waxay keeneysaa fashil ku yimaada diiwaangelinta codbixiyeyaasha oo qaranka tacab badani ka galay, waxaana Somaliland ka soo gaadhi doona hantaaqo iyo dhibaato aanay ka soo kaban karin, iyada oo hore ay u fashilantay diiwaangelintii codbixiyeyaasha ee 2008/2009.
Sidaas darteed Xisbiga WADDANI qayb kama noqon doono soo jeedin, qorshe ama go’aan kasta oo lagu hakinayo ama dib loogu dhigayo diiwaangelinta guusha ku dhow oo aannu u aragno in haddii la hakiyo ama dib loo dhigo ay qaranka u geysanayso dhib weyn oo aanu ka soo kaban karin.
Ugu danbayntii Xisbiga WADDANI waxa uu soo jeedinayaa in la isku wado u gurmadka shacbiga ee abaaraha iyo diiwaangelinta cod-bixiyeyaasha, maadaama ay diiwaangelitu ka dhammaatey Gobollada Awdal, Togdheer, Saaxil, Hawd iyo Gebiley, loona baahan yahay in si siman looga hawl-galo gobollada dalka
Md. Cabdiraxmaan Maxamed Cabdillaahi (Cirro)
Guddoomiyaha Xisbiga WADDANI
