Madaxweyne Silaanyo Oo Ka Hadlay Askari ka Tirsanaa Ciidammada Ilaaladda Xeebaha Somaliland Oo Ay Dileen Ciidanka Badda Ee Djibouti.
Madaxweynaha Jamhuuriyadda Somaliland Md. Axmed Maxamed Maxamuud (Siilaanyo) ayaa sheegay markii u horeysay ka hadlay hawl-gal ay ciidammada badda ee Jabuuti ay ku dileen askari ka tirsan ciidammadda xeebaha mid kalena ku dhaawaceen dhawaan.
Madaxweyne Axmed Siilaanyo oo galabta dalka dib ugu soo laabtay ka dib socdaal shaqo oo qaatay muddo afar maalmood ah oo uu ku tagay dalka Kuwait.
Madaxweynaha Somaliland waxa uu warbaahinta kula hadlay xarunta madaxtooyadda, waxaanu ka warramay booqashadiisii Kuwayt iyo kullamadii uu la yeeshay madaxda dawladda Kuwait oo uu ugu horeeyo boqorka dalkaasi.
“Waxaan safar afar maalmood ah aan ku tagay dalka Kuwait , muddada aan halkaas joogay waxaan kulamo la qaatay madaxda dalka Kuwait oo ugu horreeyo amiirka dalka Kuwait, Amiir Sheikh Sabah Al-Ahmad Al-Jaber Al-Sabah. waxaan amiirka kala hadlay sii xoojinta xidhiidhka labada dal, waxaan si gaara uga mahad-celiyay Amiirka mashaariicda horumarineed ee dhaxal-galka ah ee boqortooyada Kuwait ka fulisay dalka, kuwaas oo shacbiga iyo dawladda Somalilandba dareensan-yihiin.Waxaan u gudbiyay Amiirka mashaariic horumarineed oo muhiim ah, oo Somaliland waxa lagula qabanayo, ugana soo jawaabi doono si dhakhso leh,”ayuu yidhi Madaxweynaha Somaliland, waxaanu intaas ku daray
“Sidoo kale, waxaan la kulmay madaxda hay’adaha Khayriyga ee ka hawl gala dalka Kuwait oo ugu horeeyo Guddomiyaha Guddiga maamulka hay’adaha khayriga, ahna La-taliyaha amiirka dalka Kuwait , Dr Cabdalla Mactuug Almactuug.
Waxaanan kala hadlay Abaaraha ka jira Somaliland iyo sida ay gurmad deg deg ah uga gaysan lahayd Boqortooyada Kuwait, isla markaana ay u sii balaadhin lahayd taakulaynta ay siiso dadka dhibaatooyinku la soo darseen.”
“Waxaan gabo-gabadii kulan xog waraysi la yeeshay jaaliyada Somaliland ee dalka Kuwait, oo aan ugu waramay ujeeddada safarkayga iyo xaalada guud ee uu wadanku maraayo.”
Madaxweynaha Somaliland oo la weydiiyay mowqifkiisa la xidhiidha tallaabadii ay ciidamadda xeebaha Jabuuti ku dileen askari ka tirsan ciidammada xeebaha Somaliland, midna kalena ku dhaawaceen jasiiradda Ceebaad ee Somaliland, waxaanu ku jawaabay
“Ciidamada Jabuuti iyo Somaliland-ba wixii dhex maray annagu haddii aanu Somaliland nahay wixii dalkayaga difaaciisa khayr ugu jiro, dani ugu jirto diyaar ayaanu u nahay, waana aanu difaacaynaa, waanan ka war qabaynaa, waanan la soconaynaa inshaalaahu Tacaalaa.”
