Wada hadaladii u furmayay xisbiga Waddani iyo siyaasiyiinta isbahaysiga KULMIYE, ayaa la filayaa inay toddobaadka dambe si rasmi ah u bilaabmaan, waxaanu dhinac waliba magacaabayaa guddi kooban oo bilowda wada hadalka.
Ilo xogogaala ayaa Geeska Afrika u sheegay in xisbiga Waddani iyo siyaasiyiinta isbahaysiguba ay diyaarsadeen guddigii uga qayb geli lahaa wada hadalada, waxaana la sugayaa wasiirkii hore ee arrimaha dibadda Maxamed Biixi Yoonis oo la filayo inuu toddobaadkan bilaabmaya soo gaadho magaalada Hargeysa si uu saaxiibadiisa isbahaysiga u xoojiyo, kalana qayb galo bilowga wada hadalada.
Siyaasiyiinta Isbahaysiga ayaa wada hadalkan ay la galayaan xisbiga Waddani, wuxuu u muuqdaa inuu ka duwanyahay wada hadaladii ay hore ula galeen xisbiyada qaarkood, waxaana la dareemayaa diyaar garowga ay ugu jiraan sidii ay xisbiga Waddani ula geli lahaayeen wada hadal adag.
Dadka siyaasadda falanqeeya ayaa aaminsan in siyaasiyiinta isbahaysigu ay aakhirka si rasmi ah ugu biiri doonaan xisbiga mucaaradka ah ee Waddani, iyagoo xisbigas ku kordhin doona cudud, maadaama oo ay ka soo kala jeedaan deegaano kala duwan oo ay miisaan ku leeyihiin.
