Mid kamid ah diyaaradaha dagaalka ee Ciidamada Cirka ee Ciraaq ayaa Isniintii shalay si khalad ah u duqeysay qeybo kamid ah magaalada caasimada ah ee Baqdaad.
Ugu yaraan 12 qof ayaa ku dhimatay duqeynta ka dhacday xaafada Baqdaad Jadiidiya oo ku taal bariga caasimada.
Guryo badan oo ku yiilay xaafada ay bambaanada diyaarada ku dhacday ayaa burburay, waxaana la sheegay dadka dhintay inay ku jiraan caruur iyo haween.
Afhayeen u hadlay ciidamada dowlada Ciraaq ayaa sheegay in mid kamid ah diyaaradooda oo kasoo qeyb qaadatay duqeynta xarumaha ISIS ay xiligii ay dib ugu soo noqneysay xaruntooda Baqdaad ay si khalad ah uga fakatay mid kamid ah bambaanooyinkii ay diyaarada xambaarsaneyd, arrintan oo uu afhayeenka ku sheegay cilad farsamo.
