Markab sida in ka badan 3000 qaxooti isku jira Soomaali iyo Yemeniyiin ah ayaa shalay gelinkii dambe soo gaarey dekadda magaalada Bosaaso.
Qaxootigan ayaa kasoo ambabaxay dekadda magaalada Mukalla, waxayna ku qaadatay dhowr maalmood in ay soo gaaraan Bossaso sababo la xiriira hawada Badda oo kacsanayd, waxayna isku jiraan haween, caruur iyo rag oo tiro ahaan gaaraya 3,502-qof.
Masuuliyin ka tirsa Xukuumadda Puntland, maamulka gobolka Bari iyo kan degmada Bossaaso ayaa kusoo dhoweeyay dekadda, waxaana ku jirey sidoo kale Hay’addaha Caafimaadka iyo kuwa gargaarka.
Dadka xaaladoodu liidatay ayaa la geeyay xarumaha caafimaadka sidii loola tacaali lahaa.
Wasiir kuxigeenka arrimaha gudaha Puntland Cabdullaahi Xaashi Qoob-deero ayaa sheegay in ay sii wadayaan gargaarka ay u fidinayaan qaxootiga kasoo cararaaya colaada Yemen, mar uu u waramayay BBC-da.
Tan iyo markii ay dagaalada ka bilowdeen dalka Yemen, waxaa deegaanada Puntland soo gaarey qaxooti ku dhow 20,000 qof oo intooda laga caawiyey sidii ay u gaari lahaayeen goboladii ay doonayeen.
