Tababaraha xulka Argentina Gerardo Martino ayaa qirtay inuusan waxba barin Lionel Messi halkii xilli ciyaareed ee uu macalin ka ahaa Barcelona.
Tababaraha ayaa shaqada Barcelona la wareegay xilli ciyaareedkii 2013-14, laakiin waxa uu ku guuldareystay inuu soo xareeyo koob weyn ka dib markii Atletico Madrid ay xaqiijisatay koobka La Liga maalintii ugu danbeysa ee xilli ciyaareedka.
Martino ayaa hore u qirtay inuu ogsoon ahay inuu qaladaad waa weyn sameeyay waqtigiisii Barcelona laakiin haatan waa uu ku fogaaday isagoo qirtay inuusan waxba ku soo kordhinin kooxda Barcelona xilli uu u waramayay jariirada Argentina ee Clarin.
Markii la weydiiyay haddii uu wax baray Messi markii ay isla wada joogeen Barcelona, Martino ayaa yiri: “Waxba, waxba ma barin gabi ahaanba. Waxba ma barin isaga ama Barca.
“Wax xusuus ah kagama tagin Barcelona, waa wax aad u yar waqtigeygii Barcelona marka loo fiiriyo waxa aan sameeyay tababare ahaan.
“Waa wax caqligal ah in guuldarro lagu tilmaamo xilli ciyaareedkeygaas. Waxaan aaday koox wax walba ku guuleysan jirtay mar walba, waxna kuma aysan guuleysanin markii aan halkaas joogay. Supercopa waxba lama ahan Barcelona.
“Waxa kaliya aan ka bartay Barcelona ayaa ah inay igu hareereysan yihiin xiddigo, kuwa ugu fiican dunida.
“Qaladaad waa weyn ayaa sameeyay markii aan joogay Barcelona. Maxay ahaayeen? Waxaan ku sheegi doonaan mar kale.”
Source: Laacib.net
