Cali Axmed Cabdi (Cali Cantar) oo ka mid ah Masuuliyiinta Xisbiga Mucaaradka ah ee WADDANI, ayaa ka hadlay Xaaladda amni ee Magaalada Laascaanood, halkaasi oo dhawaan lagu dilay Guddoomiyihii Maxkamadda Gobolka Sool iyo Taliyihii Sirdoonka.
Mr. Cantar oo Shalay Saxaafadda kula hadlay Magaalada Hargeysa ayaa Xukuumadda ku dhaliilay inay ka gaabisay in baadhid lagu sameeyo Dilalkii u dambeeyay ee Laascaanood ka dhacay, si looga gun-gaadho halka Sartu ka qudhuntay.
Cali Axmed Cabdi (Cali Cantar) oo Arrimahaa ka hadlayaana wuxuu yidhi “2-dii bishan waxa la dilay Xasan Sheekh Cumar oo ahaa Guddoomiyihii Maxkamadda Gobolka Sool, haddana waxa lagu xigsiiyey Cabdiqani Guhaad Xasan oo ahaa Taliyihii Ciidanka Sirdoonka ee Gobolka Sool, Labada Ilaahay ha u naxariisto, Madaxweynuhuna wuu ka hadlay.”
Cantar wuxuu soo jeediyey in Dawladda dhexe tagto Sool, isla-markaana baadhitaan qoto-dheer lagu sameeyo Dilalka loo geystay labada Masuul “Haddii Dawladnimo jirto waa in la tago oo la baadho, oo baadhista hore u joogtay aan ahayn oo xoojin ah la geeyo oo wixii Dilka geystay (la baadho weeyaan)…”Ayuu yidhi, waxaanu intaa sii raaciyey in intii Xukuumadihii Kulmiye ee Talada Dalka u kala dambeeyay Somaliland hoggaaminayeen ay Laascaanood noqotay Sayladda Dilka “Illaa Dawladdii Kulmiye siday u dhalatay meeshaasi waxay ahayd Saylad Dadka lagu laayo..”
