Doorashadii Maamulka Jubboland Oo Dhacaysa Khamiista Iyo Beesha Caalamka Oo Digniin Horleh Soo Saartay
Wadamada caalamka ee saaxiibka la ah soomaaliya ayaa ka digay in doorashada khamiista ka dhacaysa maamulka Jubboland ay horseedo qalalaase iyo gacan ka hadal ka dhaca magaalada Kismaayo.
Warsaxaafadeed ay ay si wada jir ah u soo saareen wadamada iyo ururada caalamiga ah eek ala ah qaramada midoobay , Mareykanka, Midowga Yurub, Midowga Afrika, IGAD, AMISOM, Itoobiya, Infgiriiska, Canada Finland, Germany, Italy, Kenya, Holland, Norway, Sweden, Turkey iyo Uganda ayaa lagu sheegay in dhammaan dhinacyada ay khusayso doorashada maamulka Jubboland ay la kulmeen wakiilada Beesha Caalamka, si ay ugu dhiirigeliyaan inay gaadhaan heshiis keena hal nidaam doorasho oo loo dhan yahay, xor iyo xalaal ah, kuna dhaca nabadgelyo.
Warsaxaafadeedka ay ururadan caalamiga ah iyo wadamada saaxiibka la ah soomaaliya soo saareen ayaa u dhignaa sidan “Waxaan ka welwelsanahay in heshiiskaas oo meesha ka maqan ay suuragal tahay xasilooni darro iyo kala qeybsanaan ku timaada Jubbaland..” ayaa lagu yiri qoraalka Beesha caalamka oo dhinaca kale caddeysay in Doorashada la qorsheeyay 22-ka bishan Ogost darteed ayey ugu baaqday dhammaan dhinacyada Jubbaland inay ka waantobaan fal kasta oo keeni kara qalalaase iyo gacan-ka-hadal.
Waxaa qoraalka Beesha caalamka lagu soo dhoweeyay dadaalka AMISOM ku dooneyso inay ku abuurto xaalad nabadgelyo, waxaana lagu dhiirigeliyay inay xiriir iyo wada shaqeyn yeeshaan ciidamada ku wada sugan magaalada Kismaayo.
