Guddoomiyaha Xisbiga Mucaaradka ah ee Waddani Cabdiraxmaan Maxamed Cabdilaahi (Cirro) ayaa sheegay in xukuumadda Kulmiye laga doonayo in ay si waafi ah shacabka uga jaahil saarto heshiiska Dekedaha ee Dhex Maray Soomaaliya iyo Ethiopia in ay ku jirto Dekeda Berbera.
Sidoo kale waxa uu cadeeyay in Somaliland meeqaamkii ay ka taagnayd beesha caalamka ay hoos uga dhacday intii ay xukunka u kala danbeeyeen Xukuumaddaha Kulmiye.
Waxaana hadaladiisii ka mid ahaa “Waxaan isleeyahay isbedelkaasi saamayn badan ayuu nagu leeyahay, sida aan dee ilaa iminka maqlayna Somaliland arrinkaas wax dareen ah kamay bixinin, waxyaabaha lagu soo qaadayna waxa ka mid ah dekedaha soomaaliya in ay soomaaliya iyo Ethiopia ku heshiiyeen.
Markaa waxa laga rabaa Dekeda Berbera ma ku jirtaa in ay Somaliland ka jawaabto, xukuumada Muuse iyo muuse marna hadii ay yidhaahdaan imaaraadka ayaanu heshiis la galnay, marna Ethiopia iyo soomaaliya ka wada hadlayaan Dekedaha Soomaaliya, umadda waxa la rabaa in ay xog dhab ah ka siiyaan” ayuu yidhi
Sidoo kale mar la weydiiyay bal goorta uu dhaqan gelayo heshiiskii uu la galay Guddoomiyaha Ku meel gaadhka ah ee xisbiga waddani waxa uu ku jawaabay “Heshiiskii aanu ku heshiinay Cabdiqaadir iyo odeyaasha kaleba wuu hir galayaa hadii alle ka dhigo” ayuu yidhi mar uu u waramayay HCTV.
Sidoo kale waxa uu xusay in Somaliland ay go’doon kaga jirto beesha caalamka isla markaana xukuumadihii kala danbeeyay Ee Kulmiye ay ka gaabiyeen “Sideedaba la iskuma khilaafsana in xukuumadihii kala danbeeyay ee kulmiye, tan iyo tii horeba in halkii aynu ka joognay beesha caalamka aynu hoos uga dhacnay, laakiin dee wali rajadii way jirtaa, dedaal bay u baahan tahay, xukuumada lafteeda waxa laga doonayaa shaqada ay qabanayso mid ka badan in ay qabato” ayuu yidhi.
