03 December 2017
TACSI: MADAXWEYNAHA LA DOORTAY
IN-NAA LILLAAHI WA IN-NAA ILAYHI RAAJICUUN
Madaxweynaha cusub ee dhawaan loo doortay Jamhuuriyadda Somaliland, ahna Guddoomiyaha xisbul-xaakim KULMIYE Md. Muuse Biixi Cabdi waxa uu tacsi tiiraanyo leh u dirayaa qoysaska, qaraabada, ehelada iyo guud ahaan shacabka reer Somaliland ee ay ka baxeen Alle ha u naxariistee saddexda marxuum ee kala ah;
1. Ismaaciil Rashiid Cumar
2. Cabdifataax Maxamed Faarax
3. Axmed Maxamed Cabdillaahi
Kuwaas oo ku geeriyooday shil baabuur isku dhacday deegaanka Kalabaydh ee Gobolka Gabiley xalay oo taariikhdu ahayd 02/12/2017, kaas oo ay dad kalena ku dhaawacmeen.
Madaxweynaha la doortay waxa uu si gaar ah tacsi ugu dirayaa Marwo Hodan Axmed Cabdillaahi oo ah sarkaalad ka tirsan xisbiga KULMIYE oo hooyo u ahayd marxuum Ismaaciil Rashiid Cumar.
Ugu dambayntii Madaxweynaha cusub waxa uu Marxuumiintaas geeriyooday Alle uga baryayaa inuu jannadiisa Firdowsa ka waraabiyo, qoysaska, qaraabada, ehelka iyo shacabkana uu Samir iyo Iimaan Saadiq ah ka siiyo, sidoo kalena uu Alle caafimaad sareecan ah siiyo dadka kale ee ku dhaacwamay shilkaasi. Aamiin….Aamiin….Aamiin.
Xafiiska Warbaahinta Xisbiga KULMIYE
