Guddida Doorashooyinka Jamhuuriyadda Somaliland, ayaa shaaciyay in uu dhammaaday ololahi doorashada madaxtinimada ee Somaliland, kaas oo soo socday 21- maalmood, waxaanay xisbiyada uga digeen in ay shaaricyada la yimaadaan astaamahooda.
Waxa kaloo Guddidu ay sheegtay in hawada laga saari doono baraha bulshadu ku xidhiidho, sida (Facebook, Twitter, Viber, WhatsApp) iyo kuwa kale ee la midka ah, maalinta doorashada ilaa inta lagu dhawaaqayo natiijada codbixiyayaasha Doorshada.
“Waxaannu go’aan ku gaadhnay oo amar ku siiney shirkadaha isgaadhsiinta in la xidho saxaafadda bulshada (Social Media), waana hakin ee gabiahaanba lama xidhayo, guddida doorashooyinka qaranka Somaliland haddii aanu nahay go’aankaasi waanu qaadanay, waananu ku amarnay shirkadaha inay go’aankaasi fuliyaan, waanay nala qaateen, waxaannu isla garaney shirkadaha isgaadhsiinta in maalinta doorashada, marka ay dhammaato codeyntu in la xidhi lixda makhribnimo, baraha bulshada,”ayuu yidhi Afhayeenka Komishanka doorashooyinka, Siciid Cali Muuse oo ka hadlay shirjaraa’id oo ay ku qabteen xaruntooda shalay.
Guddoomiyaha guddida doorashada Somaliland , Md.Cabdilqaadir Iimaan Warsame, ayaa ku dhawaaqay in uu soo dhammaaday ololahii doorashada madaxtooyadu, waxaannu yidhi; “Maanta (Shalay) oo ay bishu tahay 10/11/201 waxaa lixdii cawaysnimo xidhmay ololihii doorashada. ololahaasi oo inoo bilaabmay 21-kii bishii hore, sidaas ayuu innoogu dhammaaday.”
“Waxaannu xisbiyada faraynaa kuna amraynaa lixda galabnimo laga bilaabo inaan loo ogolaanayn inuu xisbina bannaan-bax sameeyo inuu xisbina isaga oo taageeyaashiisa wata dibadda u soo baxo, xisbina looma ogola in waxyaabihii astaamaha u ahaa xiligii ololaha uu la soo baxo, ciidammada qarankuna waxaannu halkan uga sheegaynaa in xisbiga ku kaca ay gacan bir ah ku qabtaan,”ayuu yidhi Guddoomiyaha guddida doorashooyinku.
