Xarakada Al-Shabaab ayaa ku hanjabtay inay weerarayaan Ciidamada Mareykanka ee ku sugan Soomaaliya, kuwaasoo taageeraya ciidamada dowladda iyo kuwa AMISOM.
Afhayeenka Al-Shabaab Sheekh Cali Dheere oo fariin cod ah soo duubay ayaa ka hadlay weerarkii shalay lagu qaaday saldhig ciidamada dowladda ku lahaayeen deegaanka Bariire, halkaasoo lagu dilay askar fara badan.
Cali Dheere ayaa sheegay in Mareykanka ay mar un dhadhamin doonaan xasuuqa ay u geysteen ciidamada dowladda ee ay ku weerareen Bariire.
Waxaa uu sheegay in ciidamada ay shalay ku beegsadeen Bariire ay ahaayeen kuwii ay soo tababareen Ciidamada Mareykanka, ayna u dhigeen cashar sida uu hadalka u dhigay.
Afhayeenka Al-Shababa ayaa sheegay in weerarkii shalay lagu qaaday saldhigga ciidanka Bariire uu aar-gud u ahaa dadkii rayidka ahaa ee lagu xasuuqay deegaankaas iyo deegaanka Axmed Yare ee ku yaalla duleedka degmada Jilib.
Boqolaal ka tirsan Ciidamada Mareykanka ayaa ku sugan Soomaaliya, kuwaasoo tababaro iyo la talin siiya Ciidamada dowladda iyo kuwa AMISOM, waxaana mararka qaar ka qeyb qaataan howl galada.
