Madaxweynaha maamul gobolleedka Puntland Dr. Cabdiweli Maxamed Cali Gaas ayaa maanta shir saxaafadeed ku qabtey aqalka Madaxtooyada, kadib amrkii Golaha Wakiiladu ay xasaanadii kala noqdeen Golahiisi Wasiirada.
Madaxweynaha Dawladda Puntland oo kahadlaya kala laabashada xasaanadda golaha wasiiradda Dawladda Puntland ayaa ku tilmaamay talaabada ay qadeen maanta golaha wakiiladda Puntland mid dastuuriya oo waajibaad kooda shaqo la taxaluqda.
“Sida aad lawada socotaan waxaa ay maanta oo taariikhdu tahay Talaado 18 July ,2017, ay golaha baarlamaanka Puntland kala noqdeen xasaanadii golaha Xukuumadda Dowladda Puntland , taasi oo ah arrin dastuuri ah oo waajibaad-kooda shaqo ah…:” ayuu yiri Madaxweynaha Dawladda Puntland.
Dhinaca kale Madaxweynaha Puntland ayaa xaqiijiyey inuu golihiisa Wasiiradda kusoo dhisidoono muddada uu ogolaanayo dastuurku, isla markaa waxa uu Madaxweynuhu hoosta ka xariiqay inuu la tashan doono Madaxweyne kuxigeenka dawladda Puntland Eng. Cabdixakiin Xaaji Cabdulaahi Cumar Camey.
“Taasi waxay i faraysa Madaxweyne ahaan in aan Golaha Xukuumadda kusoo dhiso, muddada uu ii ogolyahay Dastuurku, anigoo la tashanaya Madaxweyne Ku xigeenka Dowladda Puntlandsida uu qabo Dastuurka Puntland….” ayuu yiri Madaxweynaha Dawladda Puntland.
