Warar xog ogaal ah oo ay helayso shabakada wararka Ramaasnews kana soo gaadhaya magaalooyinka Hargeysa iyo Burco ayaa waxay sheegayaan in ay magaalooyinka Hargeysa iyo Burco iyo waliba deegaanada hoos yimaada ay ka bilaabmatay iibsashada kaadhadhka codbixiyayaasha ee qaybintoodu ka socoto gobolada Togdheer iyo Marood-jeex.
Kaadhadhkan codbixiyayaasha ayaa waxa ka iibsanaya muwaadiniinta sida naloo sheegay masuuliyiin ka kala tirsan xisbiyada KULMIYE Iyo WADDANI oo taxan Hargeysa ilaa Burco,kuwaas oo muwaadinka soo qaata kaadhka la galaya ballamo iyo shuruudo adag,iyaga oo taas badalkeedana siinaya qadar lacaga oo ay badhna u qadimayaan muwaadinka kaadhka soo qaatay badhka kalena ay kula ballamayaan inay siinayaan maalinka codaynta.
Sidoo kalena xogahan ayaa waxay noo tibaaxayaan in muwaadinka ay masuuliyiintani ka iibsanayaan kaadhadhka ay dhaarinayaan in uu xisbigooda u codaynayo maalinka doorashada,waxaana qadarka lacaga ee kaadhadhka lagu kala iibsanayaa ay wakhti xaadirkan magaalooyinka Hargeysa iyo Burco ka marayaan $70 (Todobaatan Dollar) halka deegaanada miyiga ah ee hoos yimaada goboladana uu marayo qiimaha kaadhku 45$ (Shan iyo Afartan Dollar).
Masuuliyiintan xisbiyada KULMIYE iyo WADDANI u qaabilsan iibsashada kaadhadhka codbixiyayaasha ee taxan Hargeysa ilaa Burco ayaa ah dhalinyaro xisbiyadaasi ka tirsan,kuwaas oo muwaadin kaste oo kaadhka soo qaata oo ay arkaana ku qancinaya mid kasteba dhankooda inuu u codeeyo maalinka doorashada,taas badalkeedana la siinayo lacagtaasi marka uu qofka muwaadinka ahi ogolaado shuruudahaasi.
Sidoo kalena wararka ayaa waxay intaa kusii darayaan in dhalinyaradan xisbiyada ka tirsani ay muwaadinka ay kaadhka ka iibsanayaan ay sidoo kale ku qancinayaan inuu soo ururiyo dhalinyaro iyo haween kale,taas badalkeedana isaga la siinayo lacag dheeraad ah oo ah adeega uu qabtay ah (Commision Service).
Dhanka kale guddiga komishanka Qaranka Somaliland Ayaan iyagu wali ka hadal arrinkan kala iibsashada kaadhadhka codbixiyayaasha doorashooyinka ee la sheegay in Hargeysa iyo Burco iyo deegaanada hoos yimaadaba ay ka bilaabmatay.
Gabagabadiina arrinka kala iibsashada kaadhadhka codbixiyayaasha doorashooyinka ayaa labadii cisho ee u danbeeyey waxa laga dareemayey gudaha magaalooyinka Hargeysa iyo Burco oo ay ku eeg tahay wajiga koowaad ee qaybinta kaadhadhka codbixiyayaashu maalinka Sabtida ee fooda inagu soo haysa,halka deegaanada magaalooyinka Burco iyo Hargeysa ka baxsana shalay laga soo gabagabeeyey qaybinta kaadhadhka codbixiyayaasha loona soo dhaadhiciyey kaadhadhkasi degmooyinka Burco iyo Hargeysa.
