Wararka naga soo gaadhaya magaalada Oodwayne ee xarunta gobolka Daadmadheedh soona gaadhaya xafiiska shabakada wararka Wargane ayaa waxay sheegayaan in israsaasayn xoogan ay shalay deegaanka Oodwayne ku dhex martay ciidamo ilaalinayey shaqaale ka tirsan shirkada Sahaminta shiidaalka ka wada Somaliland iyo shacabka deegaanka oo ka gadooday arrimo ay kula kaceen shaqaalihii shirkadu.
Waxaana xogaha nasoo gaadhayaa ay sheeegayaan in shaqaale ka tirsan shirkadaasi oo watay laba cagaf cagaf iyo ciidamado ilaalinayey ay isku dayeen In ay qasab ku bilaabaan hawlaha shaqada ee sahaminta Shiidaalka,waxaana sida naloo sheegay u tagay si ay wax uga soo ogaadaan arrinkan odayaasha iyo waxgaradka Oodwayne kuwaas oo shaqaalihi ka codsaday inay u sheegeen hawlaha ay wadaan,intaasi ka dib ayaa shaqaalihii shirkadu waxa ay sheegeen in ay bilaabayaan shaqada loo soo igmaday iyaga oo ciidamaduna ugu hanjabay odayaashii inay xidh-xidhayaan.
Sidoo kalena xogaha aan ka helayno is rasaasayntan ayaa waxay intaa ku darayaan in shacabkani ay ka gadoodeen kadib markii ay ogaadeen in shaqaalaha ka shaqaynaya arrimaha sahaminta shiidaalka ee laga bilaabayo gobolka Daadmadheedh ay yihiin kuwo laga keenay gobolka Saraar taas oo ballanka uu wasiirka macdanta iyo Tamarta Somaliland la galay odayaasha deegaanka ay ahayd in ay deegaanka kaste oo laga bilaabayo arrimaha sahaminta shiidaalka ay shaqaalaha ka shaqaynayaa ay noqonayaan dad deegaanka taas oo ula muuqatay in wasiirku uu ka baxay ballan qaadkii uu sameeyey.
Intaasi kadib ayaa waxa is rasaasayn aan khasaare sababini dhex martay dadkii deegaanka iyo ciidamadii ilaalinayey shaqaalahan,waxaana dadka deegaanku ay la wareegeen gacaf cagafyadii lagu wadey shaqada,waxaana intaasi kadib soo kala dhex galay odayaashii iyo waxgaradkii deegaanka Oodwayne kuwaas oo shacabkii gadooday kasoo wareejiyey gaadiidkii ay kala wareegeen shirkadan.
Ilaa hadda xal lagama gaadhin halka uu khilaafku ka curtay.
