“Cali Khaliif waxa ku dhacay Xanuun Qofku jeclaado Qofka markii hore u dhibay..” Dr. Gaas
Madaxweynaha Maamul-Gobolleedka Soomaaliyeed ee Puntland Dr. Cabdiweli Maxamed Cali (Gaas), ayaa ka hadlay Wada-hadallada u bilaabmay Kooxda Cali Khaliif Galaydh iyo Dawladda Somaliland, waxaanu Weerar Afka ah ku qaaday Cali Khaliif.
Dr. Gaas oo Shalay dib ugu laabtay Magaalada Garoowe, ka dib Safar uu ugu maqnaa Magaalada Muqdisho oo uu kaga qayb-galay Shirkii Madasha Wada-tashiga Soomaaliya ee lagaga arrisanayey Doorashooyinka Soomaaliya, ayaa sheegay inuu Maqlay Wada-hadallada u socda Somaliland iyo Kooxda Khaatumo ee uu hoggaamiyo Cali Khaliif Galaydh, laakiin wuxuu sheegay in Maamulkiisa Puntland aanu aqoonsanayn Kooxda Khaatumo, sidaa daraadeed Galaydh yahay Shaqsi dan leh.
Madaxweyne Gaas oo Arrimahaa ka hadlayaana wuxuu yidhi, “Waxaan Maqlayey Cali Khaliif oo leh waxaanu heshiis la galeynaa Somaliland, horta Maamul Khaatumo la yidhaahdo oo aanu Aqoonsanahay ma jiro.
Gaas wuu muujiyey inuu ka xun yahay Wada-hadallada Nabadeed ee u socda Somaliland iyo Kooxda Khaatumo, waxaanu weerar Afka ah ku qaaday Dr. Galaydh, “Cali Khaliif waxa ku dhacay Xanuun Qofku jeclaado Qofka markii hore u dhibay, markaa Somalilandtii markii hore caydhsanaysay hadduu jeclaaday waanu u duceynaynaa ee ha u tago.”ayuu yidhi.
