WAR-SAXAAFADEED
Sidii caadada ahayd waxa loogu bushaaraynayaa dhammaan dadweynaha reer Somaliland iyo dhamaan dadka Soomaalida ah in uu bilaabmayo bandhig sannadeedkii 9aad ee Buugaagta Caalamiga ah ee Hargeysa maalinta Sabtida ah, 23 July 2016 kaas oo socon doona muddo Lix maalmood ah kana furmaya Hotel Guuleed ee Magaalada Hargeysa.
Sannad kasta Bandhigga Bugaagta Caalmiga ee Hargeysa wuxuu qaataa hal ku dheg ka jawaabaya babac-dhigyada Somaliland horyaalla. Hal-ku-dhegga sannadkan ee Bandhigga Buugaagta Caalamiga ahi waa ‘Hoggaaminta iyo Curinta’ oo ka turjumaysa in ay bulshadu wax ka barato nooca hoggaamineed ee loo baahan yahay iyo curinta fikrado siyaasadeed iyo qaar bulsheed oo horseed u noqon kara horumar, sinnaan iyo caddaalad kana turjuma hadafka guud ee ummadeed.
Bandhigga Buugaagta Caalamiga ee Hargeysa waxa uu fursad siin doonaa in hal-abuuryaashu ay wax ka yidhaahdaan mustaqbalka bulshadooda. Qorayaasha, gabayaaga, culimada, suxufiyiinta iyo aqoonyahanka kele ee isaga kala yimid dhamaan daafaha dunidu waxa ay ka qaybgalayaasha la wadaagi doonaan hal-abuurkooda kala duwan oo isugu jira qoraallo, farshaxan, masraxiyado, miyuusig iyo fikir is waydaarsi. Madashu waxa ay cid walba fursad u siinaysaa dood-wadaag iyo is waydaarsiga aragtiyaha iyo fikradaha kala duwan.
Ka qaybgalayaashu waxa ay fursad u heli doonaan in ay la falgalaan lana kulmaan aqoonyahanno magic weyn ku leh dunida guud ahaan iyo Somaliland gaar ahaanba. Kuwaas oo inta bandhiggu socdo ay ka qaybgalayaashu wax ka waydiin karaan curisyadooda iyaga oo ka faa’idaysanaya khibraddooda iyo aqoontooda kal duwan.
Sidii dhaqanka bandhiggu ahaa, waxa doorkanna bandhigga inoo daadihinaya akhyaar isaga timid dalka gudihiisa iyo dibeddiisaba isuguna jirta Soomaali iyo ajaanib ka kala yimid daafaha adduunka kuwaas oo hadafka keliya ee ay u imanayaan ay tahay in ay inagala qayb galaan bandhigga wax badanna ay inaga bartaan innaguna aynu wax ka baranno. Ka soo qayb-galayaashu waxa ay isugu jiraan qoraayo, hal-abuurro, aqoon-yahanno, mufakiriin iyo khubaro keleba.
Ballanteennu waa Bandhigga Buugaagta Caalamiga ee Hargeysa, Maalinta Sabtida, 23 July, 8:30 Subaxnimo iyo Hotel Guuleed ee magaalada Hargeysa.
Wixii faahfaahin ah kala xidhiidh:
Tel: 0633628220
Email: hibf@hargeysabookfair.com
http://www.hargeysabookfair.com/HIBF2016/
https://www.facebook.com/xarunta/
https://twitter.com/hibf
