Dufcadii siddeed iyo labaatanaad ee ciidamada booliska Somaliland oo loo bixiyay Guul ALLA ayaa ka qalan jabiyay dugsiga tababarka ciidamada ee degmada Mandheera, kuwaasi oo ka koobnaa shan boqol oo Askari.
Munaasibad shalay lagu qabtay dugsiga tababarka ee degmada Mandheera oo Cutubkan shanta boqol ee askari ah loogu soo xidhayay tababarka ay qaateen ayaa wax ka soo qaybgalay Wasiirka wasaarada arimaha gudaha Cali Maxamed Warancade, Wasiirka wasaarada Madaxtooyada Maxamuud Xaashi Cabdi iyo Taliyaha ciidamada booliska sarreeyo guuto Cabdillaahi Fadal Iimaan.
Wasiirka wasaarada arimaha gudaha mudane Cali Maxamed Warancade oo halkaasi ka hadlay ayaa waxa uu sheegay in ciidamada boolisku yihiin kuwa ay dadku ku seexanayeen, isla markaana looga baahan yahay in ay noqdaan qaar ka duwan dadka kale, waxaana uu yidhi ”Waxa tihiin madaxdii iyo hogaamiyayaashii iyo hagayaashii bulshada reer Somaliland, waxa aad tihiin ku wii ay ku seexanyihiin ee marka ay arkaan indhuhu ku doogsanayeen ee ku soo dhawaanayeen ayaad tihiin, waxa umadda Somaliland u noqonaysaan dugsi waxa la doonayaa in aad maskaxdiina galisaan maanta in aad ka duwan tihiin noloshii aad shalay soo marteen.
Wasiirka wasaarada Madaxtooyada Maxamuud Xaashi Cabdi oo isaguna halkaasi ka hadlay ayaa waxa uu tilmaamay in loo baahan yahay in garsoorka, cadaalada iyo amniga loogu adeego qof kasta oo reer Somaliland ah waxaanu yidhi “Dalku waa dal balaadhan waxaana loo baahanyahay garsoorka, cadaalada iyo amniga in loogu adeego qof kasta oo meel joogo, ilaa ka buurta iyo banaanka saran, si taa loo helo waa in la xoojiyo tayada iyo tirada ciidamada booliska Somaliland, siyaasadaas ayaan u aragnaa in la xoojiyo, marba waynu kor dhinaynaa, hadii aynu xoojinay amaanka caasimada iyo amaanka magaalo madaxyada, waxa aynu maanta xoojinaynaa amaanka degmooyinka, miyiga, buuraha iyo banaanada.”
Taliyaha ciidamada booliska Somaliland Sareeyo guuto Cabdillaahi Fadal Iimaan ayaa isaguna waxa uu kula dardaarmay ciidamadan tababarka qaatay in ay u shaqeeyaan umaddooda waxaanu yidhi “Waxa tababarkan aad ka faa’iideen is barasho, kii ka yimid gobolka Xaysimo iyo kii ka yimid Saylac kol haday halkan tababar ku wada qaateen is barasho ayay kala faa’idayaan, ciidanku is dhex galo ayay laga faa,idayaa qaabka shaqada iyo sida loo tababarayo ciidamada.,waxaana idikula dardaarmayaa oo booliska looga baahanyahay qof kasta oo muwaadina oo u soo dacwooda iyo wax kasta oo loo sheego marka ugu horaysa in uu u qaato wax xaqiiqa oo dhaba oo jira.”
