Waalidiinta ay caruurtoodu wax ka barto Jaamacadda Hargeysa iyo sidoo kale ardayda dhigata Jaamacadaasi ayaa cabasho xoogan ka muujiyay nidaamyo cusub oo uu ardayda ku soo rogay maamulka Jaamacadda iyo hoos u dhac ay sheegeen inuu ku yimid tayadda waxbarasho ee Jaamacadaasi.
Waxaanay ka dayriyeen waalidiinta dhalay caruurta dhigata Jaamacadda Hargeysa qorsheyaal mudooyinkan dambe maamulka Jaamacadu ku soo rogay ardayda, tallaabooyinkaasi oo ay sheegeen in ay culays ku noqdeen hanaanka waxbarasho ee caruurtoodda. Iyadoo hab-dhaqanadaasi ay waalidiinta ku khasbeen inay caruurtooda ka saaraan Jaamacadda Hargaysa, una bedelaan jaamacadaha kale.
Qaar ka mid ah waalidiintaasi oo la hadlay warbaahinta, ayaa noo xaqiijiyay in dhibaatooyinka ay kala kulmeen maamulka Jaamacadda Hargeysa in ay ka mid yihiin in haddii ardayga ay ka habsaanto lacagta Fee-ga oo simisterkiiba mar la wada shubo in ardaygu uu bixinayo $30, lacagtaasi oo lagu sheegay ganaax, isla markaana uu ardaygu soo raacinayo lacagta simister-ka. Haddii kale Jaamacadda laga saarayo.
Lacagtaasi $30 ah ee maamulka jaamacadda Hargaysa ugu magac bixiyay ganaax oo waalidiintu ay sheegeen inay aanay awoodin, halka ardayduna ay ku tilmaameen mid sharci daro ah oo aan la aqoon meel ay marto iyo cidda qaadata midnaba.
Mid ka mid ah waalidiinta ay carruurtoodu wax ka bartaan Jaamacadda Hargeysa oo ka cudur-daartay in magaciisa la soo xigto, oo u waramay warbaahinta ayaa noo sheegay in gabadh uu dhalay ay dhigato Jaamacadda Hargeysa, isla markaana ay tiraba saddex jeer ku dhacday arrintaasi kadib markii ay dib uga dhacday lacagtu wakhtiga laga bixiyo lacagta simister-ka. Waxaanu tilmaamay in min $30 oo ganaax ah laga qaaday saddexdaasi jeerba.
Odaygan ayaa noo sheegay in uu shaqaale ka yahay mid ka mid ah hay’adaha dawladda, isla markaana ay inta badan dib uga dhacdo xiliga uu mushaharka qaato wakhtiga ay maamulka Jaamacadu u qabteen in lagu soo bixiyo lacagta Fee-ga. Iyadoo haddii ay shan maalmood oo qudha ay dhaafto wakhtiga loo cayimay in ardayda u dhigata jaamacadda lagu ganaaxo $30, taasi oo ku khasabtay odaygan inuu inantiisii ka saaro Jaamacadda Hargeysa una bedelay Jaamacadaha gaarka loo leeyahay.
Sidoo kale waalidiin badan oo ay dhacdooyin noocan ah kala kulmay jaamacadda Hargaysa, ayaa ku tilmaamay tallaabadan in Jaamacaddii qaranku ay isku bedashay il-dhaqaale ama xarun ganacsi, isla markaana ay lumisay sumcadii iyo karaamadii ay bulshadu u haysay. Iyadoo markii hore loo arkayay inay tahay Jaamacad qaran oo tayaddeeda tacliimeed ay ka duwan tahay Jaamacadaha gaarka loo leeyahay.Hase yeeshee hadda ay u muuqato inay sii bur-burayso, nidaamyada foosha xun iyo tayadeed waxbarasho ee sii xumanaysa awgeed, taasi oo jaamacadda ka dhigay sidii Dukaan ganacsi oo kale.
Jaamacadda Hargeysa oo ah Jaamacadda keliya ee dawladu maamusho dhaqaale ahaan iyo xagga horumrintaba, isla markaana miisaaniyadda dawladda kab iyo kharashaad ugu jiro, loona arko inay tahay Jaamacad qaran, oo ay ahayd in lagu soo hirto ayaa hadda u muuqata mid isku bedashay meherad ganacsi.
Sidoo kale sida ay noo xaqiijiyeen qaar ka mid ah ardayda wax ka barata Jaamcadda Hargeysa, waxyaabaha muujinaya hoos u dhaca heerka waxbarasho ee ku yimid inay ka mid yihiin macalimiin la’aan, qalabka lagu tuso ardayda barata culuumta Sayniska tijaabooyinka oo aan jirin iyo waxyaabo kale.Caqabadan oo ay sheegeen inay sumcad darro ku keeneen Jaamacadda, sidaas darteedna ay arday badankoodii iskaga tageen Jaamacadda halka kuwo kalena ay u bedasheen Jaamacadaha kale.
Saxaafada magalaada hargeysa oo isku deyay in ay eedahan iyo dhaliilahan la isku barkiyay wax ka waydiiyaan maamulka Jaamacada ayaanay u suurto-gelin, kadib markii ay waayeen in ay xafiisyadooda kula kulmaan hogaanka jaamacadda, halka marar badan oo aanu telefoonka kula xidhiidhnayna ay naga qaadi waayeen.
Si kastaba ha ahatee, Jaamacadda Hargeysa oo ah Jaamacadda labaad ee ugu da’da weyn Jaamacadaha Somaliland ayaa sanadihii u dambeeyay waxa ka jiray khilaaf ragaadiyay oo muddo soo jiitamay, khilaafkaasi oo u dhaxeeyay hogaanka Jaamacada, hase yeeshee khilaafkaasi ayaa la soo af-jaray bilowgii sannadkan, ka dib markii la bedalay maamulkii sare ee jaamacadda. Maamulka hadda hogaamiya Jaamacadda Hargeysa ayaa waxa dul-hoganaya dhaliilo badan, iyadoo aan la saadaalin Karin sida ay maamulka jaamacadu iskaga baraxi doonaan fadeexadaha hadheeyay.
