Wasiir ku-xigeenka Wasaaradda Ganacsiga iyo Maalgashiga Somaliland Kayser Cabdillaahi Axmed, ayaa ka xog-waramay ujeeddada kulan ay Shalay Xarunta Wasaaraddaas kula yeesheen Qaar ka mid ah Ganacsada Dalka.
Wasiir Kayser, waxa uu sheegay in Ganacsatada ugu tagtay Wasaaraddu ka mid ahaayeen Ganacsatada isla-markaana u soo gudbiyeen Cabasho ka dhan ah Maamulka Dekedda Berbera oo lacago dheeraad ah ku soo rogay Alaabooyinka ay halkaas kala soo degaan, sidaa daraadeedna ay doonayaan in Wasaaradda Ganacsigu hoos u eego Cabashadooda oo wax laga qabto.
Kayser Cabdillaahi Maxamed, oo arrimahaa ka hadlayaa waxa uu yidhi, “Waxaa Xarunta Wasaaradda Ganacsiga noogu yimid Qaar ka mid ah Ganacsatada Jamhuuriyadda Somaliland. Sababta ay noogu yimaaddeen waxay ahayd oo ay ka cabanayeen lacago lagu kordhiyey Lacagta lagaga qaado Dekedda Berbera, waxayna ku doodeen Ganacsatadu in aanay awoodi karin, markaa maaddaama oo Wasaaraddu tahay Wasaaradda Masuulka ka ah Ganacsatada waxay noogu yimaaddeen inay noo sheegaan Cabashadooda, waanu la kulannay aniga iyo Wasiirka Wasaaradda Ganacsiga Dr. Muuse Qaasim.”
Wasiir ku-xigeenka Ganacsiga oo sii hadlaya, ayaa sheegay inay dhageysteen Cabashada Ganacsatada isla-markaana u ballan-qaadeen inay wax ka cabanayaan, “Waanu dhageysanay Cabashada Ganacsatada oo waxaanu u ballan-qaadnay in Cabashadooda wixii aanu ka qaban karno aanu ka qaban doono, waanad Ogtihiin Dekeddu way ka Madax-bannaan tahay (Wasaaradda Ganacsiga).”
Maamulka Dekedda Berbera, ayaa hore u sheegay in Lacago lagu kordhiyey Koontiinnarada ay alaabooyinka ku soo qaataan Ganacsatadu.
