Waxaa maanta dekadda weyn ee magaalada Bosaso ku soo xiratay dooni siday qaxooti Soomaali ah, kuwaasi oo ka soo cararay dagaalada ka jira dalka Yemen.
Qaxootigan ayaa isugu jiray rag, dumar, carruur, dhalinyaro iyo dad da’ah, isla markaana qaarkood qabay xanuuno kale duwan.
Tiro ahaan waxa ay gaarayaan 502 qof, waxaana lagala hortagay markii ay ka soo degeen doonida biyo cunto iyo dawo.
Waxaa loo gudbiyey kuwa qabay xanuunka xarumaha caafimaadka ee magaalada si xaaladooda caafimaad lagula tacaalo, halka kuwa kale la geeyey goobo ay ugu tala gashay xukuumadda Puntland.
Magaalooyinka Sanca iyo Mukalah ayey ka soo qaxeen qaxooytiga maanta dib ugu soo laabtay dalkooda.
Waiir ku xigeenka wasaaradda arrimaha gudaha Cabdullaahi Qoob deero oo warbaahinta kula hadlay gudaha dekadda ayaa sheegay in qaxootiga soo gaaray magaalada ay si wanaagsan u soo dhaweeyeen isla markana la geen doono goobo loogu tala galay.
Si kastaba ha ahaatee Puntland ayaa horay u soo dhaweesay qaxooti fara badan oo ka soo cararay dagaalada ka jira Yemen, qaarkood waxaa loo gudbiyey goobihii ay ku wajahnaayeen, halka kuwa kale la dejiyey xarun loogu tala galay oo loogo diyaariyey cunto, biyo, caafimaad iyo jiifba.
