Guddi ka tirsan xiriirka kubadda cagta ee adduunka, FIFA, oo kulan ku yeeshay dalka Qatar, ayaa ku talo bixiyay in koobka adduunka ee sanadka 2022-ka la qabto bilaha November iyo December ee sanadkaasi.
Madaxa gudigan loo saaray in uu ka talo bixiyo xilliga ugu wanaagsan ee Qatar lagu qaban karo ciyaaraha adduunka ee 2022-ka, ayaa BBC-da u sheegay in xilliga ugu macquulsan uu yahay bilaha ugu dambeeya ee sanadka.
Heer kulka dalkaasi ayaa sareeya sanadka oo dhan, waxaana uu hoos u yara dhacaa dabayaaqada sanadka.
Arrintaasi ayaa dhibaato ku noqon doonta kooxaha waaweyn ee ka dhisan Yurub, kuwaas oo doonaya in ciyaaraha koobka adduunka la qabto bisha May, si uu u yaraado hakadka ku imaanaya tartamada horyaaladooda.
FIFA ayaa go’aanka kama dambeysta ah arrinkan ka gaari doonta bisha soo socota.
