Dawladda Israel, ayaa joojisay Cashuuraha ay Maamulka Falastiin siin jirtay, iyadoo kaga aar-goosanaysa talaabada Falastiin kaga mid noqonayso Maxakamadda Caalamiga ah ee Dambiyada Dagaalka. Lacagtan ayaa Israel xaddigeeda ku sheegay 127 milyan Oo Dollar.
Ururinta Cashuurahan Israel ka qaado Qaybo ka mid ah Falastiiniyiinta oo Bishiiba mar ay u gudbiso Falastiin ayaa qayb ka ah heshiis hore,hase ahaatee Israel ayaa dhawaan sheegtay inay talaabo ka qaadayso hanka Falastiin ku doonayso inay qayb kaga noqoto Maxakamadda ICC iyo Heshiisyo caalami ah oo kale.
“Waxay ahayd in Lacagta Bishii December la gudbiyo Jimcihii, laakiin waxaa la go’aansaday inaan la gudbin waxaanay qayb ka tahay jawaabta Israel ka bixinayso Codsiga Falastiin ee ICC-da” ayuu Hay’adda warbaahineed ee Haaretz daily oo Israel ka soo baxda u sheegay Sarkaal aan magaciisa la sheegin oo Israel ah.
Erekat oo ah mas’uul sare oo ka tirsan maamulka Falastiiniyiinta ayaa tallaabada Israa’iil ku tilmaamay ciqaab wadareed sharci darro ah.
Saeb Erekat, oo u hadlay Falastiin, ayaa sheegay in Aar-goosiga Israel sababayo inaan Dad badan oo Falastiiniyiin ahi qaadan Mushaharka bishii December “Israel waxay Macaamiishayada ka urursay Cashuurtayada, sidaas darteed markay soo dayn waydo waxay noqonaysaa inaan dadku Bishan iska bixin karin Kharashaadka Iskuulada,Adeegyada Caafimaadka,Caanaha iyo Cuntada.
Arrintan ayaa Imanaysa maalmo ka dib markii Falastiin Codsi ku salaysan ka mid noqoshada Maxakamadda Caalamiga ah ee Dambiyada dagaalka u gudbisay Xoghayaha guud ee Qaramada midoobay, sidoo kalena saxeexday Cahdiyo badan oo Caalami ah. Arrintaasi ayay falastiin uga dan lahayd sidii ICC-du Awood ugu yeelan lahayd inay dambiyo dagaal ku soo Oogto Israel, waxaana talaabadaasi degdeg uga jawaabay Israel iyo Maraynka oo diidmo ka muujiyay.
Source: Ramas News
