W/Q Wasiir Hore Cawaale Shirwac
Dadka aadka iigu soo canaantay u jawaabida #Hamud #Maansheeye ee igu eedaynaya in aan Reer kale u hadlayo waxan leeyahay sidan
Marnaba ma taageero cabudhin iyo amar ku taaglayn. Hadaan xil hayey iyo hadii kaleba waan ka hadlaa hadii ay muuqato xaq daro.
Dadka u arkay in aan ka hor imid qof muwaadin ah oo aragtidiisa iyo xaqiisa sheeganaya, caqligay nagaga ciyaarayaan.
Ninkaan u jawaabayay wuxuu aduunyada la marayay #Somaliland cid gaar ah baa leh, reer Awdalna reer Somaliland ma aha.
Waa beentii baan leeyahay. Somaliland dadka dega oo dhan baa leh. Reer Awdalna #Somaliland sharciyan iyo muruqba way ku dhiseen, waliba markii ay Somaliland qarka u saarnayd in ay dunto REER Awdal baa badbaadadeeda ku suntan, badbaadinta Somaliland kamay dhicin u soo dagaalankii xoranta dalka, keliya reer Awdal dad sheegta libintaa may noqon.
Ogolaan mayno nin weyn oo raba in uu ubadka ka dhaadhiciyo WADANKA ma lihidin ee reer hebel baa leh.
Waxase xaqiiq ah in iyadoo xirfad iyo siyaasad iyo qabyaalad la isticmaalayo, ay in gaar ihi ilihii dhaqaalaha, ilihii siyaasada iyo meeshii naf lehba qaateen. Taasi waa xarfad, xarfad xaaraan ah, qaranimadana u xun (Biyokama dhibcaan).
Dawlada la xisaabtan, la xifaaltan, la gorgortan, tilmaan dhaliilaheeda iyo hadii xaqdaro ka muuqato, soo bandhig STATISTICS iyo xog si umadu kuugu garowdo. Laakiin Caruurtayada iyo dadkayaga xariirta ah ha ka been sheegin,
SOMALILAND WAA WADANKAYAGII, ANAGAA LEH, ANAGAA ADUUNYADA 30 SANADOOD TUSNAY IN SOMALILAND UMADII WADA DEGANAYD SIDAA KU TASHADEEN.
Reer Awdal waa dad xariir ah, kama helaan dawlada hada jirta een anigu xubinta ka ahaa ixtiraamkii iyo karaamadii ay mudnaayeen. Anigoo wasiir ahna waan sheegi jiray, maantana waan sheegayaa laakiin taas micnaheedu maaha Wadankaa laga leeyahay.
Wa bilaahi towfiiq.
