Tan iyo intii Sarkaal Siciid Cawil Caarre oo hore uga tirsanaan jiray Saraakiisha Ciidamada Qaranka ee Gobolka Sanaag uu Maamul Goboleedka Puntland kaga dhawaaqay Jabhad uu kala hor iman doono Somaliland ayaa waxa isa soo taraya xogo hoose oo la xidhiidha doorka Dawladda Soomaaliya iyo Maamul Goboleedka Puntland ku leeyahay la dhacsanaanta fikraddaasi iyada oo ay soo baxayaan iyana doorka ay arrintan ku leeyihiin Masuuliyiinta Dawladda Federaalka kaga jira Beesha Caarre ka soo jeedo.
Ilo-wareedyo u dhuun-daloola Xaaladdii ugu dambaysay ee Siciid Cawil Caarre iyo askarta uu ku urursanayo degmada Qardho ee Maamul Goboleedka Soomaaliya ee Puntland oo Wargeyska Foore helay ayaa waxa ay tibaaxayaan in dhawaan ay Puntland yimaaddeen Masuuliyiin Sare oo dhawr ah oo Beesha Siciid Cawil Caarre ugu jira Dawladda Federaalka Soomaaliya kuwaasi oo u socday sidii ay Puntland ugala hadli lahaayeen dacmi ama taageero la siiyo Taliye Caarre si ay ugu suurto gasho saldhigga uu ka dhisanayo Puntland ee jabhadaynta ah oo ka dhan ah Somaliland taasi oo ay masuuliyiintaasi soo dhawayn ballaadhan kala kulmeen Maamulka Puntland oo u sheegay in taageero hagar la’aan ah ay siin doonaan inkasta oo cadaadis kaga imanayo Jihooyin ay ka mid yihiin beesha Caalamka iyo gaar ahaan Urur Goboleedka IGAD oo Soomaaliya ku cadaadinaya in mashruuca Caarre la joojiyo.
Xogahan Wargeyska Foore helay waxa ay sheegayaan in dabayaaqadii Bishii hore ee ay Garoowe arrintan u yimaadeen Afar xubnood oo ahaa Wasiirro iyo xildhibaano ka tirsan Dawladda Federaalka Soomaaliya oo ay hayb ahaan wadaagaan Caarre kana soo jeeda mid ka mid ah beelaha Somaliland kuwaasi oo Jabhadka Caarre u muujiyey kalsooni iyo in qaddiyadda uu u taagan yahay ay ku garab joogaan xidhiidhana kala leeyihiin xubno gudaha Somaliland ku sugan iyo dawladaha Muqdisho iyo Garoowe labadaba.
Sidoo kale xogahan aanu helnay waxa ay sheegayaa in Urur Goboleedka IGAD oo muddoba waanwaan ka dhex waday Somaliland iyo Maamulka Puntland ay dawladda Garoowe ku war galiyeen in Arrinka Caarre uu caqabad ku noqonayo waanwaantii socotay ee la doonayay in xal loogu helo colaadda Somaliland iyo Puntland ka dhaxaysa balse lama oga go’aanka ugu dambeeya ee ay Puntland ka qaadan doonto xaaladda Taliye Siciid Cawil Caarre oo dhawaan sheegay in uu Puntland si rasmi ah u waydiistay saldhig uu kaga soo duulo Somaliland.
Waxa kale oo iyana dadka arrinkan la socdaa noo sheegeen in mashruuca Taliye Caarre uu filayo taageero uu ka helo Mashruuca is dhex galka Soomaalida (Somali Integration Program) oo ah Mashruuc lagu minjo xaabinayo Somaliland oo ay muddo hore wada dajiyeen Maamulkii Xasan Sheekh Maxamuud iyo dawlado taageeraa sida Turkiga. Kaasi oo ahaa markii hore mid ku wajahan sidii Dhallinyarada, Odayaasha, Aqoonyahanka iyo Ururrada Bulshada ee Somaliland loogu jiidi lahaa Mabda’a Soomaali weyn loogana gacan haadin lahaa Muqdisho. Balse lama oga dhaqaalaha mashruucaasi wax laga siin doono Caarre iyo Jabhadda uu abaabulayo.
Ugu dambayn ma cadda doorka iyo siyaasadda ay dawladda Somaliland ku wajihi doonto xaaladda Siciid Cawil Caarre oo Taliye Caarre loo yaqaano kaasi oo arrinkiisu yahay mid xasaasi ah halisna ku noqon kara Nabadda Somaliland maadaama uu sheegay in uu u taagan yahay qaddiyada Beeleed.
