Mid kamid ah dhaqaatiirta kooxda Liverpool ayaa ka nixiyay taageerayaasha xulka qaranka Masar ka hor koobka adduunka.
Salah ayaa haatan ku sugan magaalada Madrid, halkaas ayuu ku marayaa maanta baaritaan dheeri ah si loo hubiyo waqtiga rasmiga ah ee uu maqnaanayo.
Mid kamid ah dhaqaatiirta Liverpool ayaa xaqiijiyay in Salah uu garoomada ka maqnaanayo ku dhawaad 3 ilaa iyo 4-isbuuc taas oo ka dhigan inuu seegi doono wareega guruubyada koobka adduunka oo haddii xulka la reebo ay ka dhigan tahay inuu seegayo koobka.
“Markii aan ogaanay dhaawaca waxaan bilownay inaan ka shaqayno soo kabashadiisa, aad ayuu uga murugaysan yahay wixii ku dhacay, laakiin waxaa u muuqda sidii uu ku soo caafimaadi lahaa isla markaana uu diyaar u noqon lahaa” ayuu yiri dhaqtarka.
“Waa la go’aaminayaa waqtiga uu soo caafimaadayo, waxay u badan tahay 3 ilaa 4 isbuuc inuu u baahdo, laakiin waxaan isku dayi doonaa inaan soo yareyno farqigaas, taas ayaana haatan noo ah hadafkeena ugu wayn”.
Waxaa xaqiiq ah in Mohamed Salah uu seegayo kulanka ugu horeeya wareega guruubyada oo xulkiisu uu la ciyaarayo xulka qaranka Uruguay, laakiin waxaa loo diyaarinayaa sidii uu taam ugu noqon lahaa kulamada Sucuudiga iyo Ruushka.
