Waxaa Ayaan darro ah in hadalkiisa laga dhadhansanayo inuu ku hadlayo Afka Xisbiga Waddani, Waxaanan leeyahay riyadaadan hortaa jiraba wuu waayay”
Xisbiga Mucaaridka ah Ee WADDANI Ayaa Si Adag uga hadlay hadal kasooyeedhay mid kamid ah kaadiriinta xisbigaas ee ku dhaqan dalka dibadiisa kaasi oo magacooda u adeegsaday aasaaska koox lid ku ah qarannimada Somaliland. Md. Siciid Muuse Cabdi- Bustaale oo ah Xidhiidhiyaha Xisbiga Waddani Gobolada M/Jeex, Gabiley iyo Haw doo war saxaafadeed uu ku saxeexan yahay kasoo saaray magaallada Hargeysa ayaa sheegay in aanay xisbi ahaan qabin ujeedada hadal kasoo yeedhay Mr. Mustafe Martin oo kamid ah taageerayaasha xisbiga WADDNI ee dalka Maraykanka kaasi oo ku dhawaaqay wax uu ku sheegay United Somaliland Front. Warsaxaafadeedka Siciid Muuse Cabdi- Bustaale oo nuqul kamid ahi soo gaadhay wargeyska HUBAALna waxaa uu u dhignaa sidan: “ Waxaan halkan kaga dareen celinayaa hadal ka soo yeedhay Mr. Mustafe Maartin oo ka mid ahaa taageerayaasha Xisbiga Waddani kuna sugan dalka Maraynkanka kuna tiraabay inuu dalka Maraynkanka kaga dhawaaqay waxa uu ku sheegay United Somaliland Front oo uu Madaxweyne ka yahay.
Xisbiga Waddani oo aan ka mid ahay saraakiisha sare, ugumaanu jirin Reernimo, Qabiil ,Qollo, Shakhsi jecelayn ama shakhsi nacayb, ee waxaanu doonaynay in xisbiyadda Qaranka Jsl, lagu kala biro si looga guuro Qabyaaladda ma dhalayska ah, lana taabo geliyo hanaanka geedi socodka Dimuqraadiga Jsl ka hanna qaaday oo tiir dhexaad u ah xaqiijinta qaranimada iyo Gooni isu taagga Jsl.
Haddaba, Waxaa Ayaan darro ah in Mustafe Martin hadlkiisa riyada ah laga dhadhansanayo inuu ku hadlayo Afka Xisbiga Waddani, isagoo soo qaaday doorashadii Madaxtooyadda Jsl ka qabsoontay 13/11/2017, oo ay ku tartameen 3da Xisbi qaran, Kulmiye, Waddani iyo Ucid, oo ay ka qayb qaateen cod bixinta doorashaddaa dhamaan muwaadiniinta reer Somaliland, Iyadoo Murashixiintii u tartamay doorashada Madaxtooyada ee Xisbiyada Waddani iyo Ucid ee laga guuleystayna ay aqbaleen natiijada doorashada una hanbalyeey Murashixiintii Xisbiga Kulmiye ee ku guuleystay doorashada Madaxtooyadda Jsl.
Gebegebadii, Waxaan u soo jeedinayaa Mr. Mustafe Matin inaanu wakhti iskaga lumin riyadan mala-awaalka ah, Jamhuuriyadda Somalilandna halkan aad taagan tahay muddo hor ayay dhaaftay oo wey ka kortay, Waxaanan ku leeyahay riyadaan hortaa jiraba wuu waayay.
Wa Bilaahi Tawfiiq
Md. Siciid Muuse Cabdi- Bustaale
Xidhiidhiyaha Xisbiga Waddani Gobolada M/Jeex, Gabiley iyo Hawd
