Waxa Mudaneyaasha Lagu Wargeliyey sadexdan Xeer Oo Madaxweynuhu Dib u Soo Celiyey & Kuwo Qabyo-qoraal U Badan Oo Lagu Soo Daray Ajendaha Kal-fadhigan 35aad
Golaha Wakiillada Jamhuuriyadda Somaliland ayaa ansixiyay ajandaha kal-fadhigooda 35-aad ee golaha oo furmay toddobaadkan, kaasoo ka kooban 18 xeerar oo muhiimad weyn u leh qaranka. Fadhigaasi oo ahaa kii saddexaad ee fal-fadhiga 35-aad waxaa shir-gudoominayay guddoomiyaha golahaasi Baashe Maxamed Faarax, waxaana ka soo xaadiray 52 mudane oo ka mid ah 82 xildhibaan ee uu aqalka Wakiiladu ka kooban yahay, kuwaas oo ay saddex mudane oo kamid ahi ku cusbaayeen fadhigan. Saddexdan Xildhibaan oo kala ahaa Xildhibaan/Dr. Maxamed Axmed Cabdi (Carabeyte) oo isagu buuxiyey kursigii uu ka geeriyooday alla ha u naxariistee Marxuum/Xildhibaan Cabdiraxmaan Maxamed Talyanle oo isagu ka mid ahaa mudaneyaashii golaha wakiillada ee xisbiga KULMIYE uga soo baxay gobolka Sanaag, Xildhibaan Xasan Xuseen Shide ayaa isna ka mid ahaa mudaneyaasha ku cusub fadhigan kaasioo buuxiyey kurisgii uu ka geeriyooday alla ha u naxariistee Xil. Xasan Cawaale Caynaan oo isaguna ka mid aha xildhibaannada xisbigii UDUB uga soo baxay gobolka Hargeysa. Waxaa isaguna fadhiga ku sugnaa Xildhibaan/Abwaan. Maxamed Jaamac Cabdi (Macalin Gaaxnuug) oo buuxiyey kursigii uu banneeyey guddoomiyihii hore ee golaha wakiillada ahaana murashaxii laga guulaystey ee xisbiga WADDANI Cabdiraxmaan MAxamed Cabdillaahi (Cirro) oo xisbiga UCID uga soo baxay gobolka SAAXIL.
Hadaba Fadhigan Dorraad Ayaa Markii codka ansixinta loo qaaday ajandaha kal-fadhiga 35-aad waxa ogolaaday 32 xildhibaan, waxaana diiday 8 mudane, halka 11 xildhibaana ay ka aamuseen, iyadoo guddoomiyuhuna aanu codaynin. Sidaas ayaanu kal-fadhiga 35-aad golaha Wakiiladu ansax ku noqday, iyadoo la filayo in xildhibaanadu ay fadhiyadda danbe guddo geli doonaan doodda iyo soo jeedimaha xeerarka iyo qodobadda ku jira kal-fadhigani. Ajandaha kal-fadhigan 35-aad ee golaha Wakiillada oo ay ku jiraan 18 xeer waxa ka mid ah, qabyo-qoral xeerka guud ee degaanka (National Environment Law), xeerka shirkadaha (Company Law), qabyo-qoraal xeerka sahaminta shiidaalka iyo soo saaristiisa iyo qabyo-qoraalka xeerka ilaaladda xeebaha Somaliland. Xeerarkaasi ayaa dhamaantood waxay marayaan akhriskii kowaad. Sidoo kale waxaa ka mida xeerarka ku jira ajandaha kal-fadhiga 35-aad ansixinta masuuliyiinta qaranka, xeerarka golaha Guurtida ka soo noqda iyo wixii kale ee soo kordha.
Geesta kale Baashe Maxamed Faarax, ayaa xildhibaanadii fadhiga joogay iyo kuwa maqanba ku wargeliyay in ay golaha hor yalaan saddex xeer oo ka soo naqday madaxweynaha, kuwaasoo kala ah xeerka booliska, xeerka xabsiyadda iyo xeerka duulista hawadda. Xeerarkan oo ay hore golaha Wakiiladu u ansiiyeen, ayaa maadaama oo uu madaxweynuhu ku soo celiyay ay tahay in ay mar kale waajibkooda ka ka gutaan. Waxa kaloo uu gudoomiyuhu u sheegay xidlhibaanadda in xeerarkaasi dib loogu qaybin doona xildhibaanadda fadhiga kan xiga.
