Ra’iisalwasaaraha UK Theresa May ayaa sheegtay in Donald Trump uu ku khaladanaa sii faafinta muuqaallo Islaam naceyb xambaarsan oo ay Twitter-ka ku daabaceen qolyaha garabka Midig ee Britain.
Balse waxay carabka ku adkeeysay in sii socoshada ‘xiriirka gaarka ah’ ee ka dhexeeya Britain iyo Mareykanka uu yahay mid labada dalba ay dani ugu jirto.
Waxay sidoo kale ku gacanseyrtay dalabayda ah inay baajiso booqasho rasmi ah oo uuTrump ku imaan doono UK sanadkan.
Waxay hadalkan ka jeedisay Jordan oo ay booqasho ku joogtay maanta.
Mar sii horreysay Donald Trump ayaa Ra’iisulwasaaraha Britain Theresa May u sheegay in ay diiradda saarto argagixisada UK ka dib markii ay ku dhaliishay in uu sii faafiyay muuqaaladaasi.
“Ha igu mashquulin ee diiradda saar kooxaha argagixisada ah ee xagjirka ah ee kharbudaadda ka wada Boqortooyada Ingiriiska,” ayuu Trump ku soo qoray Twitterka.
Muuqaalkan ayay onlineka soo dhigeen koox British ah oo dhanka midig u janjeera.
Afhayeen u hadlan May ayaa sheegay in ay khalad ahayd in uu madaxweyne Trump sidaa yeelo”.
Maraykanka iyo UK ayaa xulafo dhaw ah, badanaana waxaa lagu tilmaamaa in ay leeyihiin “xiriir khaas ah”.
.@Theresa_May, don’t focus on me, focus on the destructive Radical Islamic Terrorism that is taking place within the United Kingdom. We are doing just fine!
— Donald J. Trump (@realDonaldTrump) November 30, 2017
Trump Twitterkiisa waxaa ku taxan 40 milyan, muuqaalka uu sii faafiyayna waxaa soo dhigay markii hore Jayda Fransen oo ah hogaamiye ku xigeenka kooxda Britain First, kuwaas oo uu aasaasay qof horay uga tirsanaan jiray xisbiga BNP.
Fransen ayaa Britain lagaga soo oogay dacwado ah in uu adeegsaday erayo “goodin ah, wax u dhimitaan ama cay ah.
Twitterka hore ee Fransen ayaa lagu sheegay in uu yahay qof Muslim ah oo weeraraya nin kale, waxaana sii raacay labo muuqaal oo kale Fransen uu ku sheegay Muslimiin.
Afhayeen u hadashay Aqalka Cad Sarah Sanders ayaa sheegtay in May iyo hogaamiyeyaasha kale ee caalamku ay ogaadaan “in halistani ay tahay mid dhab ah oo loo baahan yahay in laga wada hadlo”.
