Kooxda kubadda cagta Torino ayaa si rasmi ah u xaqiijisay iney daafacooda reer talyaani Davide Zappacosta ka iibiyeen kooxda Chelsea, kana iibiyeen 28 Malyan oo Euro oo ay raaci doonto gunno lagu sheegay 2 Malyan oo Euro.
Maanta galinkii hore ayey si layaab leh Blues ugu dhaqaaqday xidiga reer talyaani madama ay ku guuldareysatay helitaanka Alex Oxlade-Chamberlain, durbadiiba kooxda ka dhisan magaalada Turin wey aqbashay dalabka.
Zappacosta wuxuu usoo duulay London halkaas oo uu haatan ku sugan yahay, daqiiqado ka hor inta uusan suuqa xirmin ayey kooxda Torino ku dhawaaqday iney Chelsea ka iibiyeen xidigooda daafaca midig.
“Kooxda kubadda cagta Torino waxey ku dhawaaqeysaa iney kooxda kubadda cagta Chelsea ka iibisay Davide Zappacosta” ayuu u qornaa bayaan kasoo baxay Torino.
“Madaxweyne Urbano Cairo ayaa rajeynaya inuu Zappacosta kaga mahad celiyo qanacsanaanta, xushmeynta iyo kalsoonida uu kooxda kula joogay sanadahii uu ku sugnaa. qof walba oo Torino ahna wuxuu u rajeynayaa inuu sii wado waayahiisa”
Dhanka kale Chelsea ayaa si rasmi ah ugu dhawaaqday heshiiska 25-jirka reer talyaani ee garabka midig ee daafaca kaga ciyaarayay Torino.
“Waxey ii tahay riyo inaan ku biiray Chelsea isla markaana aan ka ciyaaro Premier League. aad baan ugu faraxsanahay inaan halkaan imaado, sidoo kalana aan kooxda la shaqo bilaabo. waxaan rajeynayaa inaan tababaraha tuso tayadeyda sidoo kale saaxiibadeyda iyo taageerayaasha”
