3 bishii Juune, ayaan qoray in anu Turkigu dhex ahayn iyo waxa la dhaafsadey joogitaankooda Somaliland, maanta afka safiirkooda ayay ka soo baxday in ay Somaliland iyo Soomaaliya hal u arkaan! waa sida uu yidhi Safiirka Turkiga u fadhiya Mugadisho oo ah ninka uu hoos tago qusulka Turkiga u fadhiya Somaliland, anoo xiganayaa hadalkiisii waxa uu yidhi “MAANU AQBALIN BAASABOORKOODA, MANA AQOONSAN, SIDA AAD LA SOCOTAAN WAXAANU WADNAA HESHIISKII SOMALIYA IYO SOMALILAND, ANAGU WAXAAN KA SHAQEYNEYNAA SOMALIA IN AY WANAAGSANAATO OO AY MID AHAATO SOMALILAND IYO SOMALIA DADKA KU NOOLI ANAGA WAXAY NOO YIHIIN HAL !!!”
Hadii dalkan madax shacabkeeda matashaa joogto waa in jawaab cad la siiya ninkaa safiirka sheeganaya oo ugu horayn la xidhaa qusuliyadooda sida ugu dhakhsaha badan, waa in Somaliland ay ka baxdaa wada-hadalada madhalayska ah ee Turkigu dhexdhexxaadiyaha ka yahay. horena waanu u sheegay maantana waa markhaati ma’doon in aanu turkigu dhex ka ahayn wada-hadalada u dhexeeya Somaliland iyo Somaliya, sideen uga fili karnaa wax inoo dan ahi in ay ka soo baxaan wadahadalo ka dhacaya dal u arka Somaliland iyo Somaliya hal?
Ninkaa hadaan maanta madaxda xukumada Somaliland iyo asxaabta qarankuba hadaaney u jawaabin waxay noqonaysaa in ummaddan madaxdeedu khiyaamaynayso oo iyaga laftoodu anay Somaliland daacad ka ahayn!! Waan sugaynaa bal waxaad ugu jawaabtaan safiirka ku dhiiraday in uu inagula hadlo af qaawan oo xitaa ka madhan xishoodka diblumaasiyada.
