Kabtanka Chelsea ee John Terry ayaa rajo ka muujiyay in uu ku sii nagaan doono kooxdiisa Chelsea ee uu waqtiga dheer ka soo ciyaarayay. Terry ayaa hore u cadeeyay in uu Stamford Bridge ka bixi doono dhamaadka xili ciyaareedkan kadib markii ay kooxdiisu u soo badhigi wayday wax heshiis kordhin ah laakiin Antonio Conte ayaa la fahansan yahay in uu doonayo in Terry uu sii joogo Chelsea.
John Terry ayay hadda da’diisu tahay 35 sano jir wuxuuna sheegay in uu jidh ahaan u fiican yahay isla markaana uu laba sano oo kale uu kubbada cagta sii ciyaari doono haddii ay Chelsea noqoto iyo haddii kaleba balse waxa uu rajeeyay in ay Chelsea noqon doonto kooxda uu sii joogi doono.
Terry ayaa Chelsea u saftay in ka badan 700 jeer wuxuuna kooxda kula guulaystay afar koob oo Premier Leaque-ga ah iyo waliba koobka Champions Leaque-ga, waxaana Terry lala xidiidhinayay horyaalka Maraykanka iyo bariga dhexe.
John Terry ayaa yidhi: “Aniga waxaa ii hadhay laba sano , xaqiiqadii waxaan doonayaa in aan sii ciyaaro waxaanan rajaynayaa in aan Chelsea sii joogo. Haddii ay Chelsea noqon waydo waxay noqon doontaa meel kale.Anigu xaqiiqdii wanaag ayaan jidh ahaan u dareemayaa waxaanan doonayaa in aan sii ciyaaro inta aan awoodayo”.
