“Faqiirnimadu waa isha ugu heyn Dagaallada iyo Nabadgalyo darada, markaa waa in horumar dhaqaale aynu samaynaa..” Safiirka Ganacsiga Dibadda ee Itoobiya
Magaalada Berbera, ayaa waxa Shir uga furmay Wefti ka socda Dawladda Federaalka Itoobiya iyo Dawladda Somaliland.
Shirkan oo Saddex Maalmood soconaya, ayaa waxyaabaha lagaga hadlayo waxa ka mid ah sidii Ganacsatada Itoobiya u xoojin lahaayeen Alaabooyinka Ganacsi ee ay kala soo degaan iyo Fulinta Mashruuca Dhismaha Jidka isku xidhaya Magaalooyinka Berbera iyo Addis Ababa.
Furitaankii Shirkan ka hor, waxa Gudaha Dekedda Berbera laga dhagax dhigay Goob loogu talo-galay in la dhigo Alaabooyinka Dekedda uga soo dega Ganacsatada Itoobiya.
“Walaalaheenna Itoobiya waxa noo socda Wada hadal la xidhiidha Ganacsiga iyo Daabulka Alaabooyinka, sidaa daraadeed waxaan Mahad iyo dhiiri-gelinba u dirayaa Maareeyaha Dekedda Berbera Cali Xoor-Xoor. Walaalaheenna Itoobiya waxaanu leenahay diyaar baanu u nahay Wax kasta oo Ganacsigeenna iyo isfahamkeenna kor u qaadaya, Xukuumadda Madaxweyne Axmed Siilaanyo-na way ka go’an tahay inay Itoobiya kala shaqeeyaan Arrimo badan sidii ay Awalba ugala shaqeyn jireen.”
Safiirka Dalka Itoobiya u qaabilsan Ganacsiga Dibadda oo isaguna ka hadlay Ahmiyadda meesha Ganacsatada Itoobiya looga qorsheeyay gudaha Dekedda Berbera gudaheeda si ay alaabtooda u dhigtaan, ayaa yidhi, “Waxaan idiinka Mahad-celinayaa inaad barxad gaar ah Dekedda uga diyaariseen Kaargooga Ganacsatada Itoobiya kala soo degaan Dekedda Berbera. Barxaddan sida gaarka ah loogu talo-galay Ganacsatada Itoobiya wuxuu wanaajinayaa xidhiidhka labadeena Shacab.”
Safiirka oo hadalkiisa sii wata, ayaa sheegay, “Waxaanu doonaynaa inaynu horumarka Wadaagno iyo Nabadgalyada Labada Waddan iyo Gobolkaba, waayo? Nabadgalyo la’aanteed ma jirayo Horumar.” Ayuu yidhi, waxaanu intaa sii raaciyey, “Faqiirnimadu waa isha ugu heyn Dagaallada iyo Nabadgalyo darada, markaa waa in horumar dhaqaale aynu samaynaa. Dawladda Itoobiya waxay horumar dhaqaale samayn kartaa marka Dalalka la deriska ahi horumar dhaqaale sameeyaan.”
