Wararka ka imanaya gobolka Gedo ayaa sheegaya in ciidamo Kenya ay dileen guddoomiyihii deegaanka Ceelcadde C/rashiid Cali Cabdi Qoorleex.
Wararka ayaa sheegaya in ciidamada Kenya ay hore u xireen guddoomiyihii deegaanka Ceelcadde iyagoo ku eedeynaya inuu gacan siiyay ciidamada Alshababa ay weeraray saldhiga ay ku lahaayeen ciidamad Kenya deegaanka Ceelcadde.
Aadan Rufle oo sheegay inuu kamid yahay saraakiisha ciidamada Mialtariga ah ee dowlada ee gobolka Gedo ayaa u xaqiijiyay warbaahinta dalka in gelinkii dambe ee shalay ay ciidamada Kenya ku dileen guddoomiyaha deegaanka Ceelcadde.
Madaxweynaha Kenya Uhuru Kenyatta ayaa hore ugu eedeeyay mid kamid ah beelaha dega gobolka Gedo ay fududeysay weerarkii ka dhacay Ceelcadde. Waxana guddi ay u xilsaartay inay baaritaan ku sameyso weerarkii Ceelcade ay sheegeen in saddex askari oo kamid ahaa ciidamada Kenya oo magan weydiistay mid kamid ah tuuloyinka ku dhow Ceelcadde.
Ciidamada Kenya ayaa weeraro duqeyn ah ku qaaday deegaano ka tirsan gobolka Gedo iyadoo duqeyntaana ay waxyeelo ka soo gaartay shacab Soomaaliyeed iyo xoolo ay lahaayeen. Mana jirto wax hadal ah oo ay dowladu ka soo saartay duqeymaha inkastoo golaha baarlamaanka uu ka codsaday Ra’iisal wasaare Sharma’arke inuu baarlamaanka horyimaado si ay su’aalo uga weydiyaan duqeyta ay ciidamada Kenya duqeeyeen deegaano katirsan gobolka Gedo.
Dilka guddoomiyihii deegaanka Ceelcadde ayaa ku soo beegmaysa iyadoo Madaxweyne xasan Sheekh Maxamuud uu uga qeybgalayo magaalada Nairobi baroordiiq loo sameynayo askartii ay ururka Alshabaab ku dishey saldhigii ay ku lahayd Ceelcadde.
