Somaliland: Guulihii Rayaale Ka Gaadhay Geeddiga Aqoonsi Raadiska Iyo Gaabiska Ku Yimid Xilligan Siilaany

Sannadihii 2005 ilaa 2010 ayaa noqday shantii sannadood ee ololihii ugu xooga badnaa lagu qaaday hawgalka aqoonsi raadiska Somaliland, waxaana mudadaas ay Somaliland ku guulaysatay inay soo jiidato indhaha dalal badan.

Hawlgaladaas aqoonsi raadiska ayaa la fuliyay mudadii uu Madaxweyne Rayaale xilka hayey ee ka dambaysay doorashadii sannadkii 2003, waxaanu Madaxweyne Rayaale talaabooyinkaas ka bilaabay dalalka Afrika, ka dib markii ay dunida reer galbeedka qaddiyadda aqoonsi raadiska Somaliland ku soo riixday inuu ka soo bilaabmo dalalka Afrika. Waxaanu Madaxweyne Rayaale ku guulaystay inuu dalal Afrikaan ah ku qanciyo inay gacan ka gaystaan aqoonsi raadiska Somaliland.

Hase yeeshee hawlgaladaas ayaa waxa uu gaabis ku yimid wixii ka dambeeyay sannadkii 2010 markii uu Madaxweyne Siilaanyo qabtay talada Somaliland ee uu kala wareegay madaxweynihii hore Md. Daahir Rayaale Kaahin.

Hawgalkii 2005 iyo Midowga Afrika

Talaabadii ugu horaysay ayaa noqotay in ururka Midowga Afrika Somaliland u soo diro wefti culus oo lagu tilmaamay xaqiiqo raadis kuwaas oo uu horkacayay ku xigeenkii guddiga Midowga Afrika ee markaas talada haysay danjire Mr Patrick Mazimhaka oo socdaal ku yimid Somaliland bishii May ee 2005, waxaanu markii uu dib uga noqday Somaliland u gudbiyay ururka Midowga Afrika warbixinta xaqiiqo raadiskii uu soo sameeyay, isagoo ku taliyay in ururka Midowga Afrika hormuud ka noqdo aqoonsi raadiska Somaliland, taariikhda Somalilandna ku tilmaamay mid xaqiiqo ah oo aan dhibaato u gaysanayn Afrika.

Warbixintaas Midowga Afrika ayaa noqotay hiilkii u horeeyay ee noociisa ah ee ay Somaliland ka hesho ururka Midowga Afrika, iyadoo ahayd warbixin qoran oo loo qaybiyay ururka Midowga Afrika.

Inkastoo aan marna ururka Midowga Afrika la soo hordhigin qaddiyadda aqoonsi ee Somaliland, haddana warbixintaasi waxay fure u noqotay in dalal badan oo ururkaas ka tirsani ay u soo jeedsadaan Somaliland islamarkaana ay wax iska weydiiyaan.

Shirkii AU ee 2007

Madaxweyne Rayaale ayaa 16 May 2006 wuxuu magaalada Addis Ababa kulan kula yeeshay guddoomiyihii guddiga Midowga Afrika Dr. Alpha Oumar Kanore, waxaanu uga waramay dedaalo ay Somaliland ka dhex waddo Midowga Afrika iyo sidii uu gacan uga gaysan lahaa hawlgal wakhtigaas socday uu shirka Midowga Afrika ee qabsoomaya 2007 lagu soo hordhigi doono qaddiyadda Somaliland, waxaana ay labada masuul isla qaateen in Somaliland codsi ay ku dalbanayso inay xubin goob-jooge ah ku yeelato ururka Midowga Afrika ay Somaliland soo dhex mariso mid ka mid ah dalalka Midowga Afrika.

Madaxweyne Rayaale iyo xukuumadiisa oo u muuqday inay dabada haysteen soo jeedintaas Dr. Alpha Oumar Kanore iyo warbixintaas Midowga Afrika ee 2005 ayaa dalal badan oo Afrikaan ah ku sameeyay galangal diblomaasiyadeed, waxaanay qaarkood ku qanciyeen inay qaddiyadda aqoonsiga Somaliland soo hordhigaan shirka madaxda Midowga Afrika, iyagoo ka bilaabaya in Somaliland loo ogolaado inay ergey goob jooge ah ku yeelato Midowga Afrika.

Sidaas daraadeed wasiirkii arrimaha dibadda ee dalka Ruwanda ee wakhtigaas, ayaa shirkii wasiirada arrimaha dibadda Afrika ee bishii January ee 2007 oo ka dhacay Addis Ababa, wuxuu ku soo hordhigay qaddiyadda Somaliland, waxaanu codsaday in laga doodo sidii aqoonsi loo siin lahaa qaddiyadda Somaliland.

Waxa kale oo uu wasiirku soo jeediyay in arrinta Somaliland la hordhigo shirka madaxweynayaasha Afrika oo beri oo kale furamayay islamarkaana ay wasiiradu khaarajiga Afrika madaxweynayaasha u soo jeediyaan in Somaliland loo ogolaado inay ururka Midoga Afrika ku yeelato xubin goob-jooge ah.

Go’aankaas wasiirka arrimaha dibadda ee Ruwanda wuxuu shirkii wasiirada arrimaha dibadda Afrika ka dhex abuuray dood iyo muran sababay in ergadii ka socotay dawladda Somaliya ay ku hanjabaan inay shirka ka dareeri doonaan.

Inkastoo ay noqotay taariikhda markii u horaysay ee Somaliland qadiyadeeda la dhex geeyo shirka wasiirada arrimaha dibadda Afrika, haddana dedaalkaasi wuxuu noqday mid aan guulaysan, laakiin waxa la dareemay culayska ay Afrika ku dhex leedahay arrinta Somaliland iyo sida ay u soo kobcaysay.

Madaxweynihii Somaliya ee wakhtigaas Cabdillaahi Yuusuf Axmed oo isna shirkaas madaxweynayaasha Afrika ka qayb galayay ayay saxaafadu weydiisay sida uu u arko in Somaliland xubin goob-jooge ah ku yeelato Midowga Afrika ayaa sheegay inuu wada hadal nabadgelyo ah la galayo Somaliland marka uu xasilyo Somaliya, waxaanu sheegay inaanu faraha la galayn arrimaha Somaliland inta uu ka soo dhammaanayo Somaliiya

Comments

comments