Somaliland: Shalay Kulankii Hadhimaddii Hogaamiyaha Iyo Ergadda Beesha

Guddoomiyaha Xisbiga Mucaaradka ah ee WADDANI Cabdiraxmaan Maxamed Cabdillaahi (Cirro), ayaa Axaddii shalay ka qaybgalay kulan Qado-sharaf ah oo ay u sameeyeen Xubno Siyaasiyiin iyo Madax-dhaqan isugu jira oo ka socday Beesha Makaahiil ee degta gobollada Saaxil iyo Maroodi-jeex, kuwaasoo wadahadal-dheer ka dib halkaas Guddi laba dhinac ah ku kala magacaabay.

Kulankaas Qado-sharafta ah oo aan Saxaafadda loo oggolaan, waxaa gogoshiisa lahaayd Beesha Makaahiil, isla markaana waxa uu ku qabsoomay Huteel Ambassador ee magaalada Hargeysa, waxaana Guddoomiyaha ku weheliyey Xubno Siyaasiyiin ah iyo Masuuliyiin Xisbiga WADDANI ka tirsan.

Inkasta oo aan Saxaafadda loo oggolaan kulankaas oo ay albaabbadu u xidhnaayeen, haddana sida ay Xubno goob-joog ahaa u sheegeen Wargeyska Ogaal, waxaa laga wadahadlay sidii ay Beesha iyo Xisbiga WADDANI wax u wada-qabsan lahaayeen, maaddaama lagu jiro wakhti loo diyaar-garoobayo doorashooyinka Madaxtooyada iyo Golaha Wakiillada ee u muddaysan dabayaaqada bisha 3-aad ee sannadka 2017-ka.

Warku wuxu intaas ku daray, Kulankaasi inuu jewi fiican iyo is-afgarad wanaagsan ku dhammaaday. Isla markaana gebo-gabadiisii lagu magacaabay Guddiyo kala meteli doona Beeshaas iyo Xisbiga, kuwaasoo sii wadi doona wadahadallada u dhexeeya Beesha iyo Xisbiga. Waxaanay Goob-joogayaashu sheegeen in Guddoomiye Cirro xubnahaa beesha uga mahad-celiyey Casuumaddaa Qado-sharafta ah ee ay u sameeyeen.

Comments

comments